पाचोरा येथील भाजप नेत्या वैशाली सूर्यवंशी यांना ब्लॅकमेलिंग करण्याचा प्रयत्न झाल्याचा प्रकार समोर आलाय. अज्ञात व्यक्तीने फोन करून त्यांच्याकडे ३० लाखांची खंडणी मागितली. तुम्ही निवडणुकीत पैसे वाटले, तुमच्याविरोधात निवडणूक आयोगात तक्रार करू असं सांगत भाजप नेत्या वैशाली सूर्यवंशींकडून ३० लाखांची खंडणी मागितली.

इतकेच नाहीतर सोशल मीडियावर बदनामीसह ड्रग्ज प्रकरणात ओढू, अशी धमकी सुद्धा या अज्ञाताने दिली होती. या प्रकरणी अज्ञात आरोपीविरोधात गुन्हा दाखल करण्यात आला आहे. मिळालेल्या माहितीनुसार, जळगाव जिल्ह्यातील पाचोरा-भडगाव विधानसभा मतदारसंघातील भाजपच्या नेत्या वैशाली नरेंद्रसिंह सूर्यवंशी यांना मागील काही दिवसांपासून अमन नावाच्या एका भामट्याने फोन करून धमक्या दिल्या होत्या.

सूर्यवंशी यांच्याकडून ३० लाख रुपयांची खंडणी मागितली होती. हा प्रकार समोर आल्यानंतर जिल्ह्यातील राजकीय वर्तुळात खळबळ उडाली आहे. अमन नावाचा व्यक्ती वैशाली सूर्यवंशी यांना मागील चार महिन्यापासून सतत फोन आणि व्हॉट्सअ‍ॅप मेसेज करून धमक्या देत होता. तसेच विधानसभा निवडणुकीदरम्यान पैसे वाटल्याची बनावट संभाषणाची क्लिप सोशल मीडियावर टाकू. निवडणूक आयोग, CBI, ED व इन्कम टॅक्सकडे तक्रार करू अशीही धमकी हा अज्ञात व्यक्तीनं देत होता.

वैशाली सूर्यवंशी यांनी शिवसेना ठाकरे गटाकडून पाचोरा-भडगाव मतदारसंघातून निवडणूक निवडणूक लढवली होती. नुकताच त्यांनी भाजपमध्ये प्रवेश केला आहे. मागील चार महिन्यापासून वैशाली सूर्यवंशी यांना अचानक धमकीचे फोन सुरू झाले. अमन नावाच्या व्यक्तीने वेगवेगळ्या मोबाईल क्रमांकावरून मागील चार महिन्यापासून सतत फोन आणि व्हॉट्सअ‍ॅप मेसेज करून धमक्या देत होता. धमक्या येण्याचे प्रमाण वाढल्यानं वैशाली सूर्यवंशी यांनी थेट पोलीस स्टेशनात तक्रार देत गुन्हा नोंदवलाय.