अभिजीत सोनवणे, साम टीव्ही

राज्यात पुन्हा राजकीय घडामोडींना वेग आलाय. स्थानिक स्वराज्य संस्थांच्या निवडणुकीनंतरही राजकीय घडामोडी सुरू आहेत. राजकीय नेत्यांच्या भेटीगाठी देखील सुरू आहेत. काही तासांपूर्वी ठाकरेंचे खासदार नागेश पाटील आष्टीकर यांनी एकनाथ शिंदेंची भेट घेतली. दुसरीकडे नाशकात शिंदेंच्या शिवसेनेचा बडा नेता नाराज असल्याची चर्चा सुरू आहे. बड्या नेत्याच्या नाराजीच्या चर्चांमुळे एकनाथ शिंदे यांना मोठा धक्का बसणार असल्याचं बोललं जात आहे.

स्थानिक स्वराज्य संस्थांच्या निवडणुकीनंतरही राजकीय घडामोडी थांबेना झाल्या आहेत. आगामी निवडणुकीसाठी सर्व राजकीय पक्षांनी आतापासूनच मोर्चे बांधणीस सुरूवात केली आहे. शिंदे गटानेही आज सोमवारी नाशिकमध्ये संघटना बांधणीची राज्यातील पहिली बैठक आयोजित केली होती.

पहिल्याच बैठकीत शिवसेनेतील अंतर्गत गटबाजी चव्हाट्यावर आली आहे. शिंदेंच्या शिवसेनेचे माजी खासदार हेमंत गोडसे यांनी बैठकीकडे पाठ फिरवली आहे. हेमंत गोडसे नाशिकमध्ये असूनही बैठकीला न आल्याने राजकीय चर्चांना उधाण आलं आहे. नव्या कार्यकारिणीत हेमंत गोडसेंना संधी न दिल्याने ते नाराज असल्याची चर्चा आहे.

तत्पूर्वी, नाशिकमध्ये श्रीकांत शिंदे, मंत्री उदय सामंत, मंत्री दादा भुसे आणि आमदार, खासदार नगराध्यक्ष, उपमहापौर नगरसेवक यांच्या बैठका सुरू आहेत. संघटना बांधणीसाठी श्रीकांत शिंदे आज सोमवारपासून राज्यभरात लोकसभा निहाय बैठका घेत आहे. या बैठक, राजकीय भेटीगाठीदरम्यान हेमंत गोडसेंची अनुपस्थिती दिसून चर्चांना उधाण आलं आहे. हेमंत गोडसेंच्या अनुपस्थितीवर मंत्री गुलाबराव पाटील यांनी पहिली प्रतिक्रिया दिली आहे. 'हेमंत गोडसे यांचं वैयक्तिक काम होते, म्हणून ते उपस्थित नव्हते. माझं संपर्क त्यांच्याशी बोलणं झालंय, अशी प्रतिक्रिया मंत्री गुलाबराव पाटील यांनी दिली.