Raj Thackeray : मनसे अध्यक्ष राज ठाकरे हे येत्या ५ जूनला अयोध्या (Ayodhya) दौऱ्याला जाणार होते. मात्र मनसे अध्यक्ष राज ठाकरे (Raj Thackeray) यांचा अयोध्या दौरा स्थगित करण्यात आला आहे. राज ठाकरे 5 जूनला अध्योध्येला जाणार होते. मात्र, त्यांच्या हा दौरा काही कारणामुळे स्थगित करण्यात आलाय. स्वत: राज ठाकरे यांनी ट्विट करत याबाबतची माहिती दिली आहे. (MNS Raj Thackeray Ayodhya Tour Postponed)

राज ठाकरे (Raj Thackeray) यांच्या अयोध्या दौऱ्यावरुन आता राजकारण चांगलंच तापायला लागले होते. येत्या 5 जूनला राज ठाकरे अयोध्या (Ayodhya) दौरा करणार होते. मात्र, त्यांच्या दौऱ्याला उत्तरप्रदेशचे भाजप खासदार बृजभूषण सिंह (Brij Bhushan Sharan Singh) यांनी जोरदार विरोध केला होता. 'राज ठाकरे यांनी आधी उत्तर भारतीयांची माफी मागावी त्यानंतरच अयोध्येत पाय ठेवावा' अशी भूमिका बृजभूषण सिंह यांनी घेतली होती.

दुसरीकडे बृजभूषण सिंह यांनी विरोध दर्शवल्यानंतर मनसे सुद्धा आक्रमक झाली होती. 'राजसाहेब ठाकरेंच्या केसालाही धक्का लागला तर, संपूर्ण महाराष्ट्र पेटून उठेल,' अशा स्वरुपाचे बॅनर मुंबईत लावण्यात आले होते. राज ठाकरेंच्या अयोध्या दौऱ्याला विरोध करणाऱ्या आणि या दौऱ्यावरून त्यांच्यावर टीका करणाऱ्यांना मनसैनिकांनी हा इशारा दिला होता.

दरम्यान, आज सकाळपासून राज ठाकरे यांचा अयोध्या दौरा पुढे ढकलला जाणार असल्याची चर्चा रंगली होती. अखेर आता प्रकृतीच्या कारणास्तव राज ठाकरेंचा अयोध्या दौरा तूर्तास स्थगित करण्यात आला असल्याची प्राथमिक माहिती समोर आली आहे. राज ठाकरे यांनी ट्विट करत आपला दौरा स्थगित करण्यात आल्याचं जाहीर केलं आहे.

सूत्रांकडून मिळालेल्या माहितीनुसार, राज ठाकरे यांच्या पायाला झालेल्या दुखापतीचा त्रास गेल्या काही दिवसांपासून वाढला आहे. त्यामुळेच दोन दिवसांपूर्वी राज ठाकरे हे पुणे दौरा अर्धवट दौरा सोडून मुंबईत आले. डॉक्टरांकडून राज ठाकरे यांना शस्त्रक्रिया करण्याचा सल्ला दिला आहे. मात्र, ही शस्त्रक्रिया कधी करायची याबाबत निर्णय राज ठाकरे घेणार आहेत.

Edited By - Satish Daud