शुभम देशमुख, भंडारा

तरुणाईमध्ये नैराश्येचं प्रमाण, तसेच अगदी छोट्या कारणांवरून लगेच टोकाचे निर्णय घेणे यासारख्या समस्या वाढल्या आहेत. अशीच एक धक्कादायक घटना भंडारामध्ये घडली आहे. एका तरुणाने आजारपणाला कंटाळून आपल्या जीवनाचा दोर कापला आहे. या घटनेने परिसरात खळबळ उडाली असून त्याच्या कुटुंबियांवर दुःखाचा डोंगर कोसळला आहे.

मिळालेल्या माहितीनुसार, सदर घटना भंडारा जिल्ह्यातील गोबरवाही पोलीस स्टेशन अंतर्गत येणाऱ्या सुंदरटोला येथे घडली आहे. मृत तरुणाचे नाव महेंद्र इनवाते असे आहे. महेंद्र हा गेल्या काही दिवसांपासून एका दीर्घकालीन आजाराने त्रस्त होता. या आजारपणामुळे तो अत्यंत नैराश्यात होता.

अखेर या आजाराला आणि वेदनेला कंटाळून त्याने आपले जीवन संपवण्याचा टोकाचा निर्णय घेतला. या घटनेमुळे सुंदरटोला परिसरात हळहळ व्यक्त केली जात आहे. घटनेची माहिती मिळताच गोबरवाही पोलिसांनी घटनास्थळी धाव घेतली असून, पंचनामा करून मृतदेह शवविच्छेदनासाठी पाठवण्यात आला आहे. या प्रकरणी पोलिसांनी आकस्मिक मृत्यूची नोंद केली असून अधिक तपास सुरू आहे.