शुभम देशमुख 
भंडारा : तुमसर तालुक्यातील चांदपुर टेमनी येथील एका खाजगी आदिवासी आश्रम शाळेत इयत्ता दहावीच्या वर्गात शिकत असलेल्या विद्यार्थीनीचा भंडारा जिल्हा सामान्य रुग्णालयात उपचारादरम्यान मृत्यू झाल्याची घटना घडली आहे. या विद्यार्थिनींची तब्बेत काही दिवसांपासून खराब होती. यामुळे  दाखल करण्यात आले होते. 

भंडारा (Bhandara News) जिल्ह्याच्या तुमसर तालुक्यातील मोठागाव (आसलपाणी) येथील राजश्री मदन वाढीवे (वय १६) असे मृत्यू झालेल्या विद्यार्थीनीचे नाव आहे. राजश्री हीची गेल्या काही दिवसांपासून प्रकृती बरी नव्हती. दरम्यान, तिला शाळा शिक्षकाने प्रथमतः सिहोरा येथील ग्रामीण रुग्णालयात उपचारार्थ दाखल करण्यात होते. सिहोरा येथील डॉक्टरानी तुमसर उपजिल्हा रुग्णालयात रेफर केले. यानंतर तिला तुमसर उपजिल्हा रुग्णालयात दाखल केल्यानंतर देखील राजश्रीच्या प्रकृतीत कुठलीच सुधारागा झाली नाही. यामुळे तिला भंडारा येथील जिल्हा सामान्य रुग्णालय रेफर करण्यात आले. 

मृत राजश्रीच्या आई वडिलांना १० लाखाची मदत 

जिल्हा रुग्णालयात आणल्यानंतर तिचा उपचारादरम्यान मृत्यू झाला. राजश्रीचा मृत्यू नेमका कोणत्या आजाराने झाला; हे अद्यापही समजू शकले नाही. राजश्रीच्या मृत्यूप्रकरणी (Ashram School) आश्रम शाळा व्यवस्थापनाने १० लाख रुपयांची मदत जाहीर केली आहे. संस्थेचे कार्यकारी सचिव यांनी वडील मदन वाढीचे यांना दोन लाख रुपयांचा धनादेश दिला. तसेच उरलेली आठ लाख रुपयांची रक्कम १५ दिवसांत देण्याचे लिखित आश्वासन दिले.