शुभम देशमुख 
भंडारा : महामार्गावरून भरधाव वेगाने जात असलेल्या ट्रॅक्टरचे स्टिअरिंग अचानक लोक झाले. यानंतर चालकांकडून ट्रॅक्टर नियंत्रित न झाल्यामुळे ट्रॅक्टर थेट महामार्गालगत असलेल्या चहाच्या दुकानात शिरले. यात दुकानावर असलेले दोन जण गंभीर जखमी झाले आहेत. सदरची घटना तुमसर तालुक्यातील राष्ट्रीय महामार्गावरील स्टेशनटोली शिवारात घडली आहे. 

भंडारा जिल्ह्यातील तुमसर तालुक्यात स्टेशनटोली शिवारात झालेल्या अपघातात टपरीत बसलेल्या तरुण लक्ष्मण हलमारे (रा. खापा) व ट्रॅक्टर चालक श्रावण भिवगडे (रा. तुडका) गंभीर जखमी झालेल्या दोघांचे नवे आहेत. माहितीनुसार स्टेशनटोली परिसरातून महामार्गाने ट्रॅक्टर भरधाव वेगात जात होते. यावेळी अचानक स्टेरिंग लॉक झाल्याने चालकाचा ट्रॅक्टर वरील ताबा सुटला. ट्रॅक्टर सरळ दिशेने जात असल्याने चालक देखील गोंधळून गेला होता. 

पान व चहाच्या टपरीला ट्रॅक्टरची धडक 

भरधाव वेगात असलेले ट्रॅक्टर महामार्गाच्या कडेला असलेल्या दिलीप वाघमारे यांच्या पान व चहा टपरीत शिरला. यावेळी टपरीत बसलेला युवक ट्रॅक्टरच्या धडकेत गंभीर जखमी झाला आहे. तसेच टपरी समोर उभ्या दुचाकीचे मोठे नुकसान झाले. तर ट्रॅक्टर चालक देखील जखमी झाला आहे. टपरीला जोरदार धडक बसल्याने मोठा आवाज झाला. यानंतर परिसरातील नागरिक जमा झाले होते. 

जखमी दोघांना रुग्णालयात केले दाखल 

दरम्यान अपघात झाल्यानंतर परिसरातील नागरिकांनी धाव घेत पान टपरीतील गंभीर जखमी युवक व ट्रॅक्टर चालकाला बाहेर काढले. यानंतर रुग्णवाहिकेला तात्काळ संपर्क साधून बोलावण्यात आले. दोघा जखमींना तुमसर येथील उपजिल्हा रुग्णालयात दाखल करण्यात आले. प्राथमिक उपचार केल्यानंतर त्यांना भंडारा येथे रेफर करण्यात आल्याची माहिती आहे. सध्या त्यांच्यावर उपचार सुरु आहे.