Summary -

• बीडमध्ये लक्ष्मण हाकेंच्या विश्वासू सहकाऱ्यावर प्राणघातक हल्ला झाला.

• या हल्ल्यात पवन कंवर गंभीर जखमी झाले आहेत.

• पवन कवर यांचे ३ साथीदार किरकोळ जखमी झाले आहेत.

• ४० ते ५० अज्ञात हल्लेखोर पवन कंवर जेवत असलेल्या हॉटेलमध्ये शिरले आणि त्यांनी मारहाण केली.

ओबीसी नेते लक्ष्मण हाके यांच्या जवळच्या सहकाऱ्यावर बीडमध्ये प्राणघातक हल्ला करण्यात आला आहे. हाके यांचे जवळचे सहकारी आणि अतिशय विश्वासू समजले जाणारे पवन कंवर आणि त्यांच्या तीन साथीदारांवर हल्ला करण्यात आला. ४० ते ५० अज्ञात व्यक्तींनी या चौघांना गाठून त्यांच्यावर हल्ला केला. या हल्ल्यात पतन कंबर आणि त्यांचे साथीदार जखमी झाले आहेत. पवन कंवर हे गंभीर जखमी आहेत. या सर्वांवर माजलगाव येथील खासगी रुग्णालयात उपचार सुरू आहेत.

मिळालेल्या माहितीनुसार, बीडच्या सावरगावजवळ मंगळवारी रात्री साडेनऊ वाजताच्या सुमारास ही घटना घडली. जेवण करण्यासाठी पवन कंबर आणि त्यांचे तीन साथीदार सावरगाव येथील एका धाब्यावर गेले होते. हे चौघेही जेवण करत असताना अचानक ४० ते ५० जण तिथे आले. या सर्वांनी त्यांच्यावर प्राणघातक हल्ला केला. लाठ्या-काठ्यांनी आणि लाथाबुक्क्यांनी या चौघांना बेदम मारहाण करण्यात आली. या मारहाणीत पवन कंवर हे गंभीर जखमी झाले. तर त्यांचे साथीदार किरकोळ जखमी झाले.

जखमी झालेल्या चौघांनाही माजलगाव येथील खासगी रुग्णालयात उपचारासाठी दाखल करण्यात आले. या हल्ल्यात पवन कंवर यांच्या डोक्याला गंभीर दुखापत झाली आहे. तर त्याच्या साथीदारांना चांगलाच मुक्कामार लागला आहे. चौघांवर देखील डॉक्टरांची टीम उपचार करत आहे.

या घटनेची माहिती मिळताच बीड ग्रामीण पोलिस स्टेशनचे पोलिस निरीक्षक बालक कोळी यांनी घटनास्थळी धाव घेतली. त्यांनीच या सर्वांना जखमी अवस्थेत रुग्णालयात नेले. पोलिस येईपर्यंत सर्व आरोपी फरार झाले होते. या प्रकरणी बीड ग्रामीण पोलिस ठाण्यात अज्ञात व्यक्तींविरोधात गुन्हा दाखल करण्यात आला असून पोलिस पुढील तपास करत आहेत.