योगेश काशीद 

बीड : दुचाकीने बाजाराला जात असलेल्या पती- पत्नीवर काळाने घाला घातला आहे. पाटोदा ग्रामीण रुग्णालयासमोर समोरून आलेल्या भरधाव बसने दुचाकीला जोरदार धडक दिल्याने भिषण अपघात झाला. या अपघातात पती- पत्नीचा जागीच मृत्यू झाल्याची घटना घडली आहे. अपघातानंतर परिसरातील नागरिकांनी गर्दी केली होती. यामुळे मार्गावर वाहतूक खोळंबली होती. 

बीडच्या पाटोदा ग्रामीण रुग्णालयासमोर हा भीषण अपघात झाला. या अपघातात बाळु केशव वायकर व त्याची पत्नी लता बाळु वायकर असे मृत झालेल्या पती- पत्नीचे नाव आहे. वायकर दाम्पत्य हे पाटोदा तालुक्यातील भाटेवाडी येथील रहिवासी असून आज पाटोदा येथील बाजाराचा दिवस असल्याने दोघेजण दुचाकीने बाजार करण्यासाठी जात होते. मात्र पाटोदा शहरात प्रवेश करण्यापूर्वीच त्यांच्यावर काळाने झडप घातली. 

बसच्या धडकेत दूरवर फेकले गेले 

वायकर दाम्पत्य दुचाकीवरून जात असताना पाटोदा येथील ग्रामीण रुग्णालयासमोर समोरून भरधाव वेगाने अचानक बस आली. या बसने दुचाकीला जबर धडक दिली. धडक बसताच दोघेजण रस्त्यावर दूरवर फेकले गेले. यात त्यांच्या डोक्याला मार लागल्याने गंभीर दुखापत झाली. यात दोघांचाही जागीच मृत्यू झाला. सदरील बस ही नांदेड कडून पुण्याकडे जात होती. 

महामार्गावर वाहतूक खोळंबली

अपघात घडल्यानंतर परिसरातील नागरिकांनी घटनास्थळी धाव घेतली. यामुळे महामार्गावरील वाहतूक खोळंबली होती. तर रस्त्यावर पडलेले दोघांचे मृतदेह बाजूला करण्यात आले. घटनेची माहिती पोलिसांना दिल्यानंतर पोलीस अपघातस्थळी दाखल झाले. यानंतर महामार्गावरील खोळंबलेली वाहतूक सुरळीत करण्यात आली होती. यानंतर दोघांचे मृतदेह रुग्णालयात नेण्यात आले होते.