विनोद जिरे, बीड

बीडच्या मस्साजोगचे सरपंच संतोष देशमुख हत्या प्रकरण आणि खंडणी हत्याप्रकरणातील आरोपी वाल्मिक कराडच्या पत्नी ज्योती जाधव यांच्या नावावर बीडच्या मांजरसुंबा परिसरात ९ एकर जमीन आहे. या परिसरात वाल्मिक कराडने एकूण ५० एकर जमीन खरेदी केल्याचा आरोप होत आहे. इतकेच नाही तर शेतकऱ्यांच्या जमिनीतील मुरुम उपसा करून स्वतःच्या जमिनीचा विकास केल्याचा गंभीर आरोप शेतकऱ्यांकडून करण्यात आला आहे.

या प्रकरणात आता मांजरसुंबा येथील शेतकऱ्यांनी आवाज उठवला आहे. शेतकरी मुकेश रसाळ यांनी आरोप केला आहे की, 'ज्योती जाधव यांनी त्यांच्या शेतातील मुरुम उपसा करून स्वतःच्या शेतात भरला. जमीन खरेदी केल्यापासूनच आम्हाला त्रास सुरू झाला. आमच्या शेतातील मुरूम उपसा केला. आम्ही प्रशासनाकडे तक्रार दिली होती. पण अजून कोणतीही कारवाई झाली नाही.'

शेतकऱ्यांनी २०२४ च्या जुलै महिन्यापासूनच ज्योती जाधव यांच्याविरोधात प्रशासनाकडे तक्रार केली असली तरी अद्याप कोणतीही ठोस कारवाई झालेली नाही. या प्रकरणात शेतकऱ्यांना न्याय मिळणार का? हे पाहणे महत्त्वाचे ठरणार आहे. वाल्मिक कराडची पत्नी ज्योती जाधव यांच्या नावावर आता पुण्यानंतर बीडमध्येही प्रॉपर्टी असल्याचे या घटनेमुळे उघड झाले आहे.

दरम्यान, वाल्मिक कराडची दुसरी पत्नी ज्योती जाधव यांच्या नावावर पुण्यामध्ये तीन फ्लॅट असल्याची माहिती समोर आली होती. आता त्यांच्या नावावर राज्यभरात कुठेकठे प्रॉपर्टी आहे याची माहिती देखील उघड होताना दिसत आहे. बीडमध्ये त्यांच्या नावावर आता जमीन असल्याचे समोर आले आहे. ज्योती जाधव या वाल्मिक कराडची दुसरी पत्नी असून त्यांना दोन मुलं आहेत.