योगेश काशीद 
बीड : बीड जिल्ह्यातील आश्रम शाळेतील शिक्षक धनंजय नागरगोजे या शिक्षकांने अकरा दिवसापूर्वी संस्थाचालक विक्रम मुंडे यांच्या कृष्णा अर्बन बँकेसमोरच गळफास घेत जीवन संपविल्याची घटना घडली होती. मृत शिक्षक नागरगोजे यांना न्याय मिळावा यासाठी त्याच्या समर्थनार्थ बीड जिल्ह्यातील आश्रम शाळा शिक्षकांनी आजपासून बेमुदत उपोषण करण्याचे हत्यार उपसले आहे. 

बीडच्या केज तालुक्यातील शाहू फुले आंबेडकर आश्रम शाळेतील शिक्षक धनंजय नागरगोजे यांनी फेसबुक पोस्ट करत आत्महत्या केल्याची घटना घडली आहे. या घटनेमुळे शाळेतील शिक्षकांनी नागरगोजे यांना न्याय मिळावा यासाठी आंदोलन पुकारले आहे. शाहू फुले आंबेडकर विना अनुदानित आश्रम शाळेतील शिक्षकांनी बीडच्या जिल्हाधिकारी कार्यालयासमोर बेमुदत उपोषण पुकारले आहे.  त्यांच्या आमरण उपोषणाचा आजचा दुसरा दिवस आहे. जवळपास यामध्ये पन्नास हुन अधिक शिक्षकांनी सहभाग नोंदवला आहे

कुटुंबाला आर्थिक मदत करा 

उपोषणकर्त्यां शिक्षकांनी मागण्यांमध्ये शिक्षकांना तात्काळ अनुदान देण्यात यावे, त्याचबरोबर धनंजय नागरगोजे यांना न्याय मिळावा व त्यांच्या कुटुंबियांना आर्थिक मदत करावी. याशिवाय धनंजय नागरगोजे यांच्या पत्नीला शासकीय सेवेत सामावून घ्यावे. त्याचबरोबर त्यांना ५० लाख रुपयांची आर्थिक मदत करावी; अशी देखील मागणी या शिक्षकांनी केली आहे.

तर आत्मदहन करणार 

या मागण्या शिक्षकांनी केल्या असून त्यांच्या बेमुदत उपोषणाचा जिल्हाधिकारी कार्यालय समोरचा दुसरा दिवस आहे. तर जोपर्यंत आम्हाला न्याय मिळत नाही; तोपर्यंत आम्ही बेमुदत उपोषण सुरु ठेवणार असल्याची भूमिका घेतली आहे. तर १ मे या महाराष्ट्र दिना पर्यंत आम्हाला न्याय मिळाला नाही; तर आम्ही आहेत त्या जागेवर आत्मदहन करणार आहोत; असा इशारा उपोषणाला बसलेल्या शिक्षकांनी दिला आहे.