गरीबाला अमानुष मारहाण करत दहशत माजवणारा गुंड सतीश भोसले उर्फ खोक्याचाच आता माज उतरवला आहे. खोक्याच्या बेकायदा घरावर वनविभागानं बुलडोझर फिरवला आहे. वनविभागानं ही बेधडक कारवाई करून खोक्याची दहशत एकप्रकारे मोडून काढली आहे.

शिरूर कासारपासून काही अंतरावर त्याचं घर आहे. बुलडोझर फिरवण्याआधी वन विभागाच्या अधिकाऱ्यांनी त्याच्या घराची झडती घेतली होती. त्याच्या घरातील सामान काढले. नंतर त्याच्या अनधिकृत घरावर बुलडोझर फिरवला.

खोक्याच्या शिरूर येथील बेकायदेशीर घरावर वन विभागानं बुलडोझर फिरवला आहे. खोक्याचं घर जमीनदोस्त करण्याची प्रक्रिया सुरू आहे. वन विभागाच्या जागेवर हे अनधिकृत घर बांधण्यात आलं होतं. त्यामुळे वन विभागाने ही कारवाई केलीय. कारवाई करण्यापूर्वी वन विभागानं खोक्याला नोटीस पाठवली होती. मात्र, ४८ तासांमध्ये उत्तर न आल्यामुळे त्याच्या घरावर बुलडोझर फिरवण्यात आला आहे.

गेल्या काही दिवसांपासून खोक्या भोसले चर्चेत होता. मारहाण प्रकरणी त्याच्यावर गुन्हा दाखल करण्यात आला होता. पोलीस त्याच्या मागावर होते. अखेर तो प्रयागराजमध्ये सापडला. त्याला बीडमध्ये आणण्याची प्रक्रिया सुरू आहे.

वन विभागानं त्याच्या अनधिकृत घरावर धाड टाकली होती. खोक्याच्या घरात धारदार शस्त्र, जाळी, प्राण्यांचे मांस असे अनेक गोष्टी आढळल्या होत्या. त्यानं आतापर्यंत अनेक जनावरांची शिकार केली आहे. खोक्याचं अनधिकृत घर देखील वन विभागाच्या जागेवर असल्याचं समोर आल्यामुळे वन विभागानं कारवाई करत खोक्याचं घर जमीनदोस्त केलंय.