बीड : बीडच्या पाटोदा बाजार समितीची ८१ गुंठे जमीन त्यावेळचे सभापतींनी पदाचा दुरुपयोग करून पणन महासंचालकांची परवानगी न घेता किंवा संचालक महामंडळाचा ठराव न घेता जमीन नातेवाईकांना विक्री केली. या प्रकरणी माजी सभापती रामकृष्ण बांगर यांच्या विरोधात तब्बल २६ वर्षांनी गुन्हा दाखल झाला आहे.

बीड (Beed) जिल्ह्यातील पाटोदा बाजार समितीचे तत्कालीन सभापती रामकृष्ण बांगर यांनी १७ ऑगस्ट १९९६ रोजी बाजार समितीची ८१ गुंठे जमीन ८० हजार रुपयांत नातेवाईक किसन कंठाळे यांना विक्री केली. (Bajar Samiti) लेखा परीक्षणात हा प्रकार समोर आला असून याप्रकरणी सहकार विभागाने गुन्हा नोंद करण्याच्या सूचना दिल्या. यावरून लेखापरीक्षक गणेश क्षीरसागर यांना तक्रार देण्यासाठी प्राधिकृत केले होते. तक्रारीवरून रामकृष्ण बांगर आणि किसन कंठाळे या दोघां विरोधात सदरील गुन्हा नोंद झाला आहे.

आता याच प्रकरणात पाटोदा पोलीस ठाण्यात बांगर यांच्या विरोधात गुन्हा नोंदविण्यात आला आहे. रामकृष्ण बांगर हे पाटोदा तालुक्यातील राजकारणातील मोठे नाव असून त्यांच्या अनेक शिक्षण संस्था आहेत. महानंदा डेअरीचे ते उपाध्यक्ष होते. त्यांचा दूध संघ असून त्यांना परिसरात सहकार महर्षी म्हणून ओळखले जाते.