योगेश काशीद, साम टीव्ही

बीडमध्ये पुन्हा एकदा वाल्मीक कराड गँग दहशत माजवत असल्याचे समोर आले आहे. दिवंगत सरपंच संतोष देशमुख यांच्या हत्येचा मुख्य आरोपी वाल्मीक कराड सध्या कारागृहात असला तरी त्याचे गांवगुंड मात्र बीडमध्ये उन्माद माजवत असल्याचा प्रकार समोर आला आहे. गेल्या एक ते दोन वर्षांपासून बीड हा राज्यात सर्वात जास्त गुन्हे घडणारा जिल्हा असल्याचे समोर आले होते. त्यामुळे जिल्ह्यात भीतीचे छायेत नागरिक हे वावरत आहे.

अशातच आज शहरात इमामपूर भागात किरकोळ कारणावरून दोन गटात शाब्दिक चकमक झाली आणि त्याचे रूपांतर थेट गोळीबारामध्ये झाले. घटनेची माहिती मिळताच बीडचे वरिष्ठ पोलीस अधिकारी घनस्थळी दाखल झाले. गोळीबार करणारे हे वाल्मीक कराड गँग असल्याचे उघडकीस झाले आहे. गोळीबार करणाऱ्यांचे वाल्मीक कराडसोबत रील आणि फोटो आता व्हायरल होत आहे.

मिळालेल्या माहितीनुसार, किरकोळ वादातून गोळीबाराची ही धक्कादायक घटना घडली. शहरातील इमामपूर रोडवर पेट्रोल पंपाजवळ रात्री साडेसातच्या दरम्यान हा प्रकार घडला. यावेळी चार राऊंड फायर करण्यात आले असून सुदैवाने यात कोणीही जखमी झाले नाही. मात्र, किरकोळ लहान मुलांच्या वादातही धोकादायक शस्त्र आणि गोळीबारी होत आहे. यात वापरले जाणारे अवैध शस्त्र येतात कुठून यासह अनेक प्रश्न उपस्थित होत आहेत. तसेच बीडमध्ये कायद्याचा धाक उरला आहे का? असा सवाल उपस्थित होत आहे. सुदैवाने यात कोणाला गोळी लागली नाही.

मात्र लाठीकाठीने मारहाण केल्यानंतर एक जण जखमी झाला आहे. यामुळे पुन्हा एकदा बीड मधील कायदा सुव्यवस्थेचा प्रश्न गंभीर बनला आहे. वाल्मीक कराड याला जेलमध्ये 5 स्टार सुविधा मिळत असल्याचा स्थानिक नेत्यांनी आरोप केला होता. तसेच तो मोबाइलचा देखील वापर करत आहे. जेलमधूनच तो आपली दहशत कायम ठेवत आहे का? असा प्रश्न आजच्या घटनेते उपस्थित होत आहे.