Beed News: बीड शहरातून धक्कादायक घटना समोर आली आहे. बीडमध्ये धावत्या कारमध्ये एका महिलेवर तिघांनी अत्याचार केल्याची धक्कादायक घटना समोर आली आहे. या घटनेने शहरात एकच खळबळ उडाली आहे. या प्रकरणी बीडच्या शिवाजीनगर पोलीस ठाण्यात प्रियकरासह अन्य दोघांवर गुन्हा दाखल करण्यात आला आहे. (latest Marathi News)

मिळालेल्या माहितीनुसार, बीड शहरातील शिवाजीनगर पोलीस ठाणे हद्दीत राहणाऱ्या एका 26 वर्षीय महिलेच्या पतीचे कोरोनात निधन झालं. यानंतर गेल्या वर्षभरापासून त्या महिलेचे एका व्यक्तीबरोबर संबंध होते. वर्षभरापासून हे दोघेही शहरांमध्ये राहत होते.

काल पीडित महिला बार्शी रोडवरून येत होती. एका कारमध्ये तिच्या प्रियकराने व त्याच्यासोबत असलेल्या दोघांनी महिलेस कारमध्ये बळजबरीने बसवून गाडी मांजरसुब्याच्या दिशेने सुसाट नेली. बीड ते मांजरसुंबा या दरम्यान प्रियकरासोबत असणाऱ्या दोन नराधमांनी महिलेला मारहाण करत तिच्यावर अतिप्रसंग केला.

यानंतर सात्रा पोत्रा या ठिकाणी गेल्यानंतर प्रियकराच्या पत्नीने सुद्धा पीडित महिलेला मारहाण केली. यामध्ये महिला जखमी झाली असून महिलेवर जिल्हा रुग्णालयामध्ये उपचार सुरू आहे. पीडितेच्या तक्रारीवरून आज बीडच्या शिवाजीनगर पोलीस ठाण्यात प्रियकर सह अन्य दोघे व एका महिलेवर गुन्हा नोंद करण्यात आला आहे.

जळगावमध्ये आठ वर्षीय बालिकेवर अत्याचार

दरम्यान, जळगाव जिल्ह्यात भडगाव तालुक्यात गोंड गाव येथे काल आठ वर्षीय बालिकेवर अत्याचार करून हत्या केल्याचा धक्कादायक प्रकार समोर आला आहे. यानंतर केवळ गोंड गावात नव्हे तर संपूर्ण राज्यभरात संतापाची लाट उसळली आहे. अत्याचार करणाऱ्या नराधमास फाशीची शिक्षा देण्यात यावी,त्यासाठी जलदगती न्यायालयात हा खटला चालविण्यात यावा,अशी मागणी होत आहे.

तसेच उज्वल निकम यांच्या सारख्या ज्येष्ठ वकिलांची नियुक्ती करण्यात यावी आणि मुलीच्या कुटुंबीयांना तातडीने आर्थिक मदत शासनाने करावी, या मागणीसाठी आज सर्व पक्षियांनी शासनाचे लक्ष वेधून घेण्यासाठी बंदचे आवाहन केले होते.