बीड : बीड जिल्ह्याला आत्महत्याचं ग्रहण लागलं आहे. दररोज कुठे ना कुठे आत्महत्याची घटना घडल्याचे समोर येत आहे. काही दिवसांपूर्वी चार शेतकऱ्यांनी एकाचं दिवशी आत्महत्या केल्या होत्या. तर काल एकाच दिवशी दोघांनी आत्महत्या केल्या होत्या. आज पुन्हा एकदा एका अकॅडमी चालक असणाऱ्या, 40 वर्षीय संचालक प्राध्यापकाने, गळफास घेऊन आत्महत्या केली. ही धक्कादायक घटना आज शहरातील नाथसृष्टी अंकुशनगर भागात घडली आहे.

राजाराम शिवाजी धस वय 40 रा.नाथसृष्टी, अंकुश नगर बीड असं आत्महत्या केलेल्या संचालक प्राध्यापकाचं नाव आहे. राजाराम धस हे शहरातील जिज्ञासा ॲकॅडमीचे माजी संचालक आहेत. तर ब्राईट ॲकॅडमीत ते प्राध्यापक म्हणून काम पाहत होते. त्या ठिकाणी ते स्पर्धा परीक्षेची तयारी करणाऱ्या मुलांची तयारी करून घेत होते.

मात्र त्यांनी आज आपल्या राहत्या घरात गळफास घेऊन आत्महत्या केल्याचा धक्कादायक प्रकार उघडकीस आला आहे. दरम्यान प्राध्यापक राजाराम धस यांनी आत्महत्या का केली? याचं कारण अद्याप स्पष्ट झालं नसून पुढील तपास शिवाजीनगर पोलिस करत आहेत.