अन्न व औषध प्रशासनाने गेले अनेक महिने फिल्डवर उतरून अवैध कामांची पोलखोल केली. मुंबई सारख्या झगमगत्या शहरांमधील नामंकित हॉटेल पासून ते अगदी गल्लीतील छोट्या मोठ्या स्टॉलवरच्या भेसळयुक्त पदार्थांवर कारवाई करण्यात आली. अशातच आता चवीने खाल्ल्या जाणाऱ्या चायनीज सेंटरवरसुद्धा अन्न व औषध प्रशासन अधिकारी तुकाराम मुंढे यांच्या टीमने धाड टाकली आहे. बीडच्या अंबाजोगाई शहरात ही कारवाई करण्यात आली असून सदर दुकान बंद करण्यात आले आहे.

मिळालेल्या माहितीनुसार, अंबाजोगाई शहरातील बाजार परिसरातील तवक्कल चायनीज सेंटरवर सोमवारी अन्न व औषध प्रशासनाने धाड टाकली. अन्न सुरक्षा अधिकारी अ. दि. नरवाडे यांच्या नेतृत्वाखालील पथकाने ३ ऑगस्ट रोजी सायंकाळी तपासणी केली. या वेळी संबंधित चायनीज सेंटरमध्ये अन्न सुरक्षा नियमांचे गंभीर उल्लंघन होत असल्याचे आढळले. तपासणीत संबंधित चायनीज सेंटर कोणत्याही परवान्याशिवाय सुरू असल्याचे तसेच स्वच्छतेच्या मूलभूत निकषांकडे पूर्णपणे दुर्लक्ष केल्याचे समोर आले. स्वयंपाकघर आणि खाद्यपदार्थ तयार करण्याच्या ठिकाणी अस्वच्छता असल्याने अधिकाऱ्यांनी तातडीने कारवाई केली.

पथकाने खाद्यपदार्थ तयार करण्यासाठी वापरल्या जाणाऱ्या कच्च्या साहित्याचे आणि इतर अन्नपदार्थांचे नमुने तपासणीसाठी जप्त केले आहेत. या नमुन्यांचा प्रयोगशाळेत अहवाल आल्यानंतर पुढील कायदेशीर कारवाई केली जाणार आहे. अन्न सुरक्षा व मानके अधिनियम, २००६ अंतर्गत आवश्यक परवाना मिळेपर्यंत संबंधित आस्थापना बंद ठेवण्याचे आदेश प्रशासनाने दिले आहेत. आदेशाचे उल्लंघन झाल्यास कठोर दंडात्मक कारवाईचा इशाराही देण्यात आला आहे.

दरम्यान, अंबाजोगाई आणि केज परिसरातून निकृष्ट दर्जाचे व अस्वच्छ अन्न विक्रीबाबत अनेक तक्रारी प्रशासनाकडे प्राप्त झाल्या होत्या. या कारवाईची माहिती परिसरात पसरताच सदर बाजारातील अनेक हॉटेल्स आणि मांसविक्रीची दुकाने घाईघाईने बंद करण्यात आली. अन्न व औषध प्रशासनाची ही मोहीम पुढेही सुरू राहणार असून नागरिकांच्या आरोग्याशी कोणतीही तडजोड सहन केली जाणार नसल्याचे अधिकाऱ्यांनी स्पष्ट केले.