योगेश काशीद, बीड

Beed Doctor Mandar Dabhade Sucide बीडच्या अंबाजोगाई येथील स्वामी रामानंद तीर्थ (स्वाराती) ग्रामीण शासकीय वैद्यकीय महाविद्यालयातील एका निवासी डॉक्टरने भाड्याच्या खोलीत गळफास लावून आत्महत्या केल्याची धक्कादायक घटना आज समोर आली आहे. या घटनेमुळे अंबाजोगाई शहरासह वैद्यकीय क्षेत्रात मोठी खळबळ उडाली आहे. डॉ. मंदार दाभाडे असे आत्महत्या केलेल्या डॉक्टरचे नाव आहे.

मिळालेल्या माहितीनुसार, डॉ. मंदार दाभाडे हे चनई परिसरातील रोहिदास नगर भागात एका भाड्याच्या घरात वास्तव्यास होते. त्यांनी आपल्या राहत्या घरात गळफास लावून आपली जीवनयात्रा संपवली. बराच वेळ त्यांच्या खोलीतून कोणताही प्रतिसाद मिळत नसल्याने ही बाब उघडकीस आली. घटनेची माहिती मिळताच अंबाजोगाई शहर पोलिसांनी तातडीने घटनास्थळी धाव घेऊन पंचनामा केला.

डॉ. मंदार दाभाडे हे सध्या वैद्यकीय क्षेत्रातील पदव्युत्तर शिक्षण घेत होते आणि रुग्णालयातील दैनंदिन कामकाजातही अत्यंत सक्रिय असायचे. एक तरुण आणि होतकरू डॉक्टर, जो वैद्यकीय क्षेत्रातील उच्च शिक्षण घेत होता, त्याने इतके टोकाचे पाऊल का उचलले? याचे नेमके कारण अद्याप समोर आलेले नाही.

स्वामी रामानंद तीर्थ ग्रामीण शासकीय रुग्णालयात पोलिसांनी मृतदेह शवविच्छेदनासाठी सहा पाठवला आहे. डॉ. दाभाडे यांच्या अशा अचानक जाण्याने स्वाराती रुग्णालयातील त्यांचे सहकारी डॉक्टर आणि कर्मचाऱ्यांमध्ये शोककळा पसरली आहे. कामाचा ताण, वैयक्तिक कारण की अन्य काही बाबी, या दिशेने पोलीस तपास करत आहेत.