बारामती: पुणे शहरात मागील चार दिवसात मुसळधार पाऊस झाला आहे. या पावसामुळे जवळच असलेल्या उजनी धरणात पाणी येण्यास सुरवात झाली आहे. मागील चार दिवसात ४.८८ टक्के इतका पाणी साठा वाढला असून धरणातील पाणी पातळीत २.२ टीएमसीने वाढ झाली आहे.

गतवर्षी कमी पावसाळा झाल्यामुळे धरणात अधिक पाणी साचले नाही. जे पाणी होते ते देखील उन्हाच्या तीव्रतेमध्ये पाण्याचे बाष्पीभवन होऊन कमी झाले होते. या ७ जुनला (Ujani Dam) उजनी धरण हे उणे ५९.९९ टक्के होते. आज चौथ्या दिवशी उजनी धरणात उणे ५५ पूर्णांक ८८ टक्के पाणी साठा झाला असून चार दिवसात उजनी धरणात २ पूर्णांक २ टीएमसी पाणी साठ्याची वाढ झाली. सध्या उजनी धरणात उणे २९ पूर्णांक ९४ टीएमसी इतका पाणी साठा आहे. 

पाऊस आल्यास पाणी पातळीत वाढणार

पुणे शहर परिसरात चार दिवस चांगला दमदार पाऊस (Rain) झाल्याने उजनी धरणात पाण्याची आवक होण्यास सुरवात झाली आहे. तर उजनीत दौंड बंधाऱ्यातून ४८६७ क्युसेक इतका विसर्ग येत असून भविष्यात पाऊस असाच राहिला हा विसर्ग वाढू शकतो. यामुळे धरणाच्या पाणी पातळीत देखील वाढ होण्याची शक्यता आहे.