बदलापूर : बदलापुरातून धक्कादायक प्रकार समोर आला आहे. बदलापुरातील एका पेट्रोलपंपावर पेट्रोलमध्ये चक्क पाणी मिसळल्याचं प्रकार समोर आला आहे. त्यानंतर ग्राहकांनी पेट्रोलपंपावर एकच गर्दी केली. त्यानंतर अतिवृष्टीमुळे हा प्रकार घडल्याचं पेट्रोलपंप व्यवस्थापकांकडून सांगण्यात आलं. ( Badlapur News In Marathi)

बदलापूर (Badlapur) पूर्वेच्या कात्रप परिसरात एचपी कंपनीचा पेट्रोलपंप आहे. या पेट्रोलपंपाच्या पॉवर पेट्रोलच्या टाकीत काल झालेल्या अतिवृष्टीमुळे पाणी मिसळलं. त्यामुळं काल इथून पेट्रोल भरून गेलेल्या १० ते १२ ग्राहकांच्या टाकीत पाणीमिश्रित पेट्रोल भरलं गेल्यानं गाड्या बंद पडण्याचे प्रकार घडले.

ग्राहकांनी पेट्रोल काढून पाहिलं असता त्यात पाणी असल्याचं लक्षात आल्यानं ग्राहकांनी हे पेट्रोल घेऊन पेट्रोलपंप गाठला. त्यावेळी सर्व ग्राहकांनी एकत्र येत पेट्रोलपंप व्यवस्थापकला घेरलं. त्यांनी ग्राहकांची समजूत काढली. त्यानंतर पेट्रोलपंपाकडून या ग्राहकांच्या गाड्यांची दुरुस्ती करून देत त्यांना मोफत पेट्रोल देण्यात आलं.

सध्या टाकीत पेट्रोलच्या टाकीत पाणी नसून पाणी नेमकं कुठून गेलं, याचा शोध सुरू असल्याचं पेट्रोलपंपाचे व्यवस्थापक कुलदीप तिवारी यांनी सांगितलं. तसंच आणखी कुणाला असा त्रास असल्यास त्यांनी पेट्रोलपंप व्यवस्थापनाशी संपर्क साधण्याचं आवाहन त्यांनी केलं.

पाणीमिश्रित पेट्रोल मिळाल्याने ग्राहकांना राग अनावर झाला होता. मात्र, पेट्रोलपंप व्यवस्थापनाकडून परिस्थिती योग्यप्रकारे हातळल्याने आणि ग्राहकांना सहकार्य केल्याने ग्राहकांचा राग शांत झाला. तसेच आणखी कुणाला असा त्रास झाल्यास त्यांनी पेट्रोलपंप व्यवस्थापनाशी संपर्क साधण्याचं आवाहन त्यांच्याकडून करण्यात आलं.