मयुरेश कडव 
बदलापूर : मुंबई, ठाणे जिल्ह्यात राज्यातील अनेक भागात मुसळधार पाऊस होत आहे. यात बदलापुरात देखील सकाळपासून मुसळधार पाऊस सुरू असून आतापर्यत शहरात ३८ मिलिमीटर इतक्या पावसाची नोंद झाली आहे. यामुळे कात्रप, हेंद्रेपाडा, बदलापूर रेल्वे स्थानक परिसरातील सखल भागात पाणी साचले आहे. मात्र शहरातून वाहणारी उल्हास नदी अजूनही इशारा पातळी खालून वाहत आहे. 

बदलापूर शहर परिसरात मुसळधार पाऊस सुरु आहे. या पावसामुळे जनजीवन विस्कळीत झाले आहे. सततच्या पावसामुळे शहरातील अनेक भागात पाणी साचले असून नदी व नाल्यांना देखील मोठा पूर आल्याचे पाहण्यास मिळत आहे. शहरातून वाहत असलेली उल्हास नदीने अद्याप धोक्याची पातळी ओलांडली नसली तरी असाच पाऊस सुरू राहिल्यास नदीचा पाणी प्रवाह इशारा पातळीपर्यंत जाण्याची शक्यता आहे. 

पालिका प्रशासन लक्ष ठेवून 

सध्या उल्हास नदीचे पाणी १४.५० मीटरवर आहे. नदीची इशारा पातळी ही १६.५० मीटर तर धोक्याची पातळी ही १७.५० मीटर आहे. या अनुषंगाने पालिकेचे मुख्याधिकारी मारुती गायकवाड यांनी उल्हास नदीवर जाऊन परिस्थितीचा आढावा घेतला. सतर्कता म्हणून पालिका प्रशासनाने अग्निशमन दलाला २४ तास सज्ज राहण्यास सांगितले आहे. तसेच दोन हजार नागरिकांची राहण्याची व जेवणाची व्यवस्था करण्यात आली असल्याचं मुख्याधिकारी मारुती गायकवाड यांनी सांगितले. 

शनीनगरातील लोखंडी पूल गेला वाहून
बदलापुरातील हेंद्रेपाडा परिसरातील शनीनगर भागातील नाल्यावरील लोखंडी पूल पुरात वाहून गेला. गेल्या काही दिवसांपासून या नाल्यावर नवीन पुलाचे काम सुरू आहे. त्यामुळे तात्पुरत्या स्वरूपात हा पूल बांधण्यात आला होता. मात्र आज नाल्याला आलेल्या पाण्यामुळे लोखंडी पूल वाहून गेला. हा पूल वाहून जातांनाचा व्हिडिओ मोबाईल कॅमेऱ्यात कैद झाला आहे. पूल बंद करण्यात आल्याने सुदैवाने कोणतीही जीवितहानी झालेली नाही.