भोंदूबाबा अशोक खरातचे नवनवीन कारनामे समोर येत असताना आता त्याच्या आर्थिक गैरव्यवहारवर देखील टाच लागली आहे. यामध्ये काही व्यवहार संशयास्पद असून हवालाच्या माध्यमातून खरातने शेकडो कोटी परदेशात पाठवल्याचा आरोप केला जात आहे. खरातच्या शिवनिका ट्रस्टच्या आर्थिक व्यवहाराचा देखील पोलीस तपास करत असून 2018 मध्ये फक्त 4 लाखांची उलाढाल असलेल्या या ट्रस्टची मालमत्ता आता कोट्यावधीमध्ये सापडली आहे.

हे सर्व आर्थिक व्यवहार सांभाळत असलेला शिवनिका ट्रस्टचा संचालक CA ललित पोफळे हा आता पोलिसांच्या रडारवर असल्याचे सांगितले जात असून त्याची देखील चौकशी होण्याची शक्यता आहे. तर CA ललित पोफळे याने स्वतःचा बचाव करण्यासाठी भोंदू खरातच्या विरोधात तक्रार करण्यासाठी पोलीस स्टेशनमध्ये गेल्याचे सांगितले जात आहे.

आर्थिक क्षमतेनुसार ठरवला जायचा बाबा

उद्योजकांच्या आर्थिक क्षमतेनुसार त्यांना ललित पोफळे हा वेगवेगळया व्यक्तिंकडे नेत असायचा. 1000 कोटींपेक्षा जास्त उलाढाल असलेल्या उद्योजकांना बंगळूरुतील लक्ष्मण महाराज, 500 कोटींपेक्षा जास्त असेलल्याना भोंदू अशोक खरात तर 200 कोटींपेक्षा जास्त असलेल्या सुजीत देशमुख यांच्याकडे नेण्यात येत होते. तसेच रघुनाथ येमुळ या ज्योतिषाकडे अनेक कस्टमर नेण्यात आले होते.

मुख्यमंत्री देवेंद्र फडणवीस यांनी देखील विधानसभेत या प्रकरणाची गंभीर दखल घेतली असून अशोक खरात आणि त्यांच्याशी संबंधित सर्व ट्रस्टची सखोल चौकशी केली जाईल अशी ग्वाही दिली आहे. एकीकडे चौकशीमध्ये रोज धक्कादायक खुलासे समोर येत असताना दुसरीकडे सीए ललित पोफळेने दाखल केलेल्या FIR मुळे प्रकरणाला कायदेशीरवळण मिळण्याची शक्यता आहे. त्यामुळे पुढे आणखी काय माहिती समोर येते याकडे सर्व राज्याचे लक्ष लागले आहे.