Ashok Kharat: अशोक खरात खायचा शक्तिवर्धक गोळ्या, अतिसेवनामुळे अर्धांगवायूचा झटका; तपासातून धक्कादायक माहिती उघड

Summary -

• अशोक खरात प्रकरणात धक्कादायक खुलासे

• शक्तिवर्धक औषधांच्या अतिसेवनामुळे अर्धांगवायूचा झटका

• खरातची एचआयव्ही टेस्ट करण्यात आली

• एसआयटी तपासातून आणखी धक्कादायक माहिती उघड होण्याची शक्यता

अभिजीत सोनवणे, नाशिक

अंधश्रद्धेच्या नावाखाली महिलांवर अत्याचार करणाऱ्या नाशिकचा भोंदूबाबा अशोक खरात प्रकरणाच्या तपासातून एक धक्कादायक खुलासा झाला आहे. अशोक खरात शक्तिवर्धक औषधं घ्यायचा. या औषधांच्या अतिसेवनामुळे खरातला दीड वर्षांपूर्वी अर्धांगवायूचा झटका आल्याची माहिती समोर आली आहे. नाशिक शहरातील एका खासगी रुग्णालयामध्ये त्याने उपचार घेतले होते. ज्या डॉक्टरने खरातवर उपचार केले होते तो त्याचा भक्त होता. या डॉक्टरने वेळीच उपचार करून खरातचे प्राण वाचवले होते. आजही खरातच्या एका हाताची हालचाल मर्यादित आहे तर भुवईत बदल दिसून येत आहे.

१५० हून अधिक महिलांचे लैंगिक शोषण करणाऱ्या अशोक खरातची एचआयव्ही टेस्ट करण्यात आली. त्याची एचआयव्ही टेस्ट निगेटिव्ह आली असल्याची माहिती समोर आली आहे. पोलिस कोठडीत त्याची एचआयव्ही टेस्ट करण्यात आली. भविष्य सांगण्याच्या बहाण्याने अशोक खरात महिलांवर लैंगिक अत्याचार करत होता. त्याने महिलांवर केलेल्या अत्याचाराचे अनेक व्हिडीओ समोर आले आहे. सध्या पोलिस आणि एसआयटी या प्रकरणाचा कसून तपास करत असून रोज नवीन नवीन धक्कादायक खुलासे होत आहेत.

दरम्यान, भोंदू बाबा अशोक खरातचा आणखी एक कारनामा समोर आला आहे. दोन मोठ्या महिला अधिकारी अशोक खरातच्या जाळ्यात अडकल्या असल्याची माहिती सूत्रांनी दिली आहे. या उच्चपदस्थ महिला अधिकाऱ्यांनी स्वतःसह अनेकांना अशोक खरातकडे नेल्याने त्या अडचणीत आल्या आहेत. एका महिलेचा व्हिडिओ व्हायरल झाल्याने ती आज तक्रार करण्याची शक्यता आहे. या महिलेने एसआयटीशी संपर्क साधल्याची माहिती समोर आली आहे. या प्रकरणात अशोक खरातचे एकएक कारनामे समोर येत असल्यामुळे त्याच्या अडचणीत वाढ होण्याची शक्यता आहे.