Ugale couple from Nashik honored with government : दरवर्षीप्रमाणे यंदाही आषाढी एकादशीला पंढरीत विठ्ठल-रुक्मिणी मंदिरात शासकीय पूजा थाटामाटात पार पडली. मुख्यमंत्री देवेंद्र फडणवीस यांच्या हस्ते पहाटे शासकीय पूजा संपन्न झाली. या शासकीय पूजेचा मान यंदा नाशिक जिल्ह्यातील नांदगाव तालुक्यातील शेतकरी दाम्पत्य कैलास उगले आणि कल्पना उगले यांना मिळाला. या दाम्पत्याला मुख्यमंत्री देवेंद्र फडणवीस यांच्यासह पांडुरंगाची पूजा करण्याची संधी मिळाली. पूजा संपन्न झाल्यानंतर मुख्यमंत्री देवेंद्र फडणवीस यांनी उगले दाम्पत्याचा सत्कार केला. त्यांना सन्मानित केल्यानंतर उगले दाम्पत्याला मुख्यमंत्र्यांनी एक वर्षासाठी मोफत एसटी प्रवासाची सवलत जाहीर केली आहे. उगले दाम्पत्य पुढील वर्षभर महाराष्ट्र महामंडळाच्या एसटी बसने मोफत प्रवास करू शकतात.

महाराष्ट्रातील वारकऱ्यांसाठी आषाढी एकादशी हा अत्यंत पवित्र आणि महत्त्वाचा दिवस आहे. या दिवशी शासकीय पूजेचा मान मिळणे ही प्रत्येक वारकऱ्याची स्वप्नवत बाब मानली जाते. यंदा हा मान मिळाल्याने उगले दाम्पत्य आनंदाने भारावले आहे. 'काय बोलावं, काहीच समजत नाही. खूप आनंद झाला आहे. आमचा नंबर लागेल, असं स्वप्नातही वाटलं नव्हतं, अशी भावना कैलास उगले यांनी व्यक्त केली.' तर, “फडणवीस साहेबांसोबत विठ्ठलाचं दर्शन आणि पूजा करण्याची संधी मिळेल, असं कधीच वाटलं नव्हतं. मी भगवंतासमोर आहे, हीच खूप मोठी गोष्ट आहे,” असे म्हणत कल्पना उगले यांनी आपला आनंद व्यक्त केला.

देवेंद्र फडणवीस काय म्हणाले ?

आषाढी एकादशीच्या निमित्ताने पांडुरंगाची पूजा करायला मिळणे हा सर्वांच्या जीवनातला आनंदाचा क्षण आहे. दिंड्या सोबत अनेक वारकरी स्वयंप्रेरणेने पायी चालत आले. वारीत प्रत्येक व्यक्ती इतरांमध्ये पांडुरंग पाहतो, ही प्रथा जगाच्या पाठीवर कुठेही नाही. वारीत हरीनाम गजर करतांना नवी ऊर्जा मिळते. वारीने खऱ्या अर्थाने भागवत धर्माची पताका उंचावत ठेवली आहे. ही आपली संस्कृती अलौकिक आहे असे सांगून मानाच्या वारकऱ्यांना पांडुरंगाचा आशीर्वाद मिळत राहो, अशी सदिच्छा फडणवीस यांनी व्यक्त केली.