नाशिकच्या TCS धर्मांतरण प्रकरणातील आरोपी निदा खान हिला संभाजीनगर येथून दोन दिवसांपूर्वी पोलिसांनी अटक केली. विशेष म्हणजे ती, तिची आई आणि मावशी हे तिघेजण एमआयएमचे नगरसेवक मतीन पटेल यांच्या घरात वास्तव्यास होते. यामुळे त्यांनाही पोलिसांनी सहआरोपी करून अटक केली आहे. तसेच त्यांचा मोबाईल ही जप्त केला आहे. या प्रकरणात एमआयएमचे नेते इम्तीयाज जलील यांचा हात असून त्यांना देखील अटक करावी अशी मागणी सामाजिक न्यायमंत्री संजय शिरसाट यांनी केली.

यानंतर आज खासदार असदुद्दीन ओवेसी हे आज संभाजीनगरमध्ये दाखल झाले आणि निदा खान हिची पाठराखण केली. ते म्हणाले, नाशिक धर्मांतरण प्रकरण हा द्वेष भावनेतून केला आहे. ज्याने हा गुन्हा दाखल केला आहे तो सत्ताधारी पक्षाचा आहे. तिच्यावर केवळ आरोप झाले म्हणून तिची मीडिया ट्रायल करून तिला दोषी ठरवण्याचा प्रकार सुरू आहे. मात्र आमचा न्यायालयावर पूर्ण विश्वास आहे. न्यायालय या मुलीला निर्दोष ठरवेल असा विश्वास असदुद्दीन ओवेसी यांनी व्यक्त केला.

घरात बुरखा आणि धार्मिक पुस्तके सापडणे कधीपासून अवैध झाले? ओवेसींचा सवाल

TCS धर्मांतरण प्रकरणातील एफआयआर बघितल्यावर समजेल की, संबंधित मुलीच्या घरातून एक बुरखा, नकाब आणि एक धार्मिक पुस्तक मिळल्याचे नमूद करण्यात आले आहे. या सगळ्या वस्तू आक्षेपार्ह कधीपासून झाल्या, असा प्रश्न ओवेसी यांनी उपस्थित केला. याआधी दिल्ली पोलिसांनी अशाचप्रकारे काही मुलांना अटक केली होती. त्यांच्याकडे मिर्झा गालिबचे पुस्तक सापडले होते. कोर्टात ही बाब समोर आल्यानंतर त्या मुलांना सोडून देण्यात आले. अलाहाबाद कोर्टातही उर्दू शेर लिहिला म्हणून काहीजणांना अटक करण्यात आल्याचा प्रकार समोर आला होता. त्यावेळीही न्यायालयाने याबाबत सवाल उपस्थित केले होते.

त्यामुळे नाशिक धर्मांतरण प्रकरनाबाबतही न्यायालय निकाल देईल आणि ती मुलगी निर्दोष ठरेल, तिच्यावरील कोणताही गुन्हा सिद्ध होत नाही, मुसलमान समाजातील शिक्षित मुलामुलीना त्रास देण्यासाठी हे सगळे केले जात आहे. पण कायदा आपल काम करेल, असा विश्वास यावेळी असदुद्दीन ओवेसी यांनी व्यक्त केला.