विधानसभा निवडणुकीसाठी भाजपने आपली पहिली यादी जाहीर केली आहे. आपल्या पहिल्याच यादीत भाजपने ९० उमेदवारांच्या नावाची घोषणा केली आहे. यातच भाजपने नाशिक पश्चिममधून सीमा हिरे यांना उमेदवारी जाहीर केली आहे. मात्र त्यांच्या उमेदवारीला आता भाजपच्याच पदाधिकाऱ्यांकडून विरोध होत आहे. त्यांना उमेदवारी दिल्यामुळे पदाधिकाऱ्यांमध्ये नाराज असल्याचं सूत्रांचं म्हणणं आहे.

सूत्रांनी दिलेल्या माहितीनुसार, सीमा हिरे याना उमेदवारी जाहीर झाल्यास काम न करण्याचा भाजप पदाधिकाऱ्यांनी इशारा दिला. मात्र आता त्यांना उमेदवारी जाहीर झाल्यानंतर भाजप पदाधिकाऱ्यांचा सीमा हिरे याना विरोध कायम असल्याचं पाहायला मिळत आहे. हिरे यांना उमेदवारी जाहीर झाल्यानंतर आता भाजप पदाधिकाऱ्यांनी उद्या महत्वाची बैठक बोलावली आहे. या बैठकीत पुढील निर्णय घेतला जाणार आहे.

तिकीट न मिळाल्याने श्रीनाथ भिमाले नाराज?

पुण्यातील पर्वती विधानसभा मतदार संघात उमेदवारीवरून वाद निर्माण झाला आहे. येथून भाजपने माधुरी मिसाळ यांना तिकीट जाहीर केलं आहे. यानंतर आता तिकीट न मिळाल्याने श्रीनाथ भिमाले नाराज असल्याची चर्चा आहे.

पर्वती विधानसभा मतदारसंघातून श्रीनाथ भिमाले इच्छुक होते. मतदारसंघातील नागरिकांशी बोलून पुढचा निर्णय जाहीर करणार असल्याचे ते म्हणाले आहेत. यातच ते बंडखोरी करू शकतात, अशी चर्चा आहे.

हिंगोलीत ही कार्यकर्ते नाराज

दरम्यान, भाजपने हिंगोली विधानसभेसाठी विद्यमान आमदार तानाजी मुटकुळे यांना चौथ्यांदा उमेदवारी जाहीर केली आहे. मुटकुळे यांना उमेदवारी जाहीर होताच पदाधिकारीकडून बंडखोरीची शक्यता वारवाली जात आहे.