मंत्रिपदाचा राजीनामा दिल्यानंतर मुंडेंच्या अडचणी कमी होण्याऐवजी वाढतच असल्याचं समोर आलंय. अंजली दमानियांनी धनंजय मुंडे, बालाजी तांदळेसह 10 जणांना सहआरोपी करण्याची मागणी केलीय.

सरपंच संतोष देशमुखांच्या हत्येनंतर सुधीर सांगळे आणि सुदर्शन घुलेला तीन आठवड्यानंतर पोलिसांनी जेरबंद केलं तर वाल्मिक कराड 22 दिवसांनी पोलिसांना शरण आला.. मात्र प्रकरण वाल्मिक कराडपर्यंत जाऊ नये म्हणून धनंजय मुंडेंनीच बालाजी तांदळेला पोलिसांसोबत शोध मोहिमेत सहभागी होण्यास सांगितल्याचा आरोप दमानियांनी केलाय...एवढंच नाही तर पोलिसांनीच बालाजी तांदळेला पत्र लिहून तपासासाठी सोबत ठेवल्याचा आरोप करण्यात आलाय.. त्यामुळे फक्त बालाजी तांदळेच नाही तर मुंडेंसह 10 जणांना सहआरोपी करण्याची मागणी दमानियांनी केलीय..

कराडला कुणाची मदत?

मुंडेंच्या सांगण्यावरुन बालाजी तांदळे पोलिसांच्या शोध मोहिमेत सहभागी झाल्याचा आरोप

कराड सीआयडीपुढे शरण येताना शिवलिंग मोराळेची गाडी वापरली

शरण येण्यापूर्वी वाल्मिकला सारंग आधळे माहिती देत असल्याचा आरोप

घुले आणि सांगळेला फरार असताना डॉ. वायभसे पती पत्नीकडून पैशांची मदत

देशमुखांच्या हत्येनंतर तपासात कुचराई केल्याचा एसपी बारगळ यांच्यावर आरोप

खंडणीवेळी पीएसआय राजेश पाटील चाटेच्या कार्यालयात उपस्थित

पीआय भागवत शेलार आणि संतोष गित्तेचा कराडसोबत संबंध असल्याचा आरोप

सीआयडीने दाखल केलेल्या आरोपपत्रात वाल्मिक कराड सुत्रधार असल्याचं म्हटलं आहे... त्यामुळे आता कराड आणि त्याच्या टोळीला मदत करणाऱ्यांना सहआरोपी केलं जाणार का? आणि धनंजय मुंडेंनाही सहआरोपी केल्यानंतर त्यांची आमदारकीही जाणार का? याकडे लक्ष लागलंय..