बापाच्या हत्येचा बदला घेण्यासाठी मुलानं आरोपींची हत्या केली आहे. ही दुहेरी हत्याकांडाची धक्कादायक घटना अमरावती जिल्ह्यातील तिवसा शहरात घडली. गेल्या वर्षी आरोपी मुलाच्या वडिलांची हत्या झाली होती. या गोष्टीचा राग मृत बापाच्या मुलाच्या मनात धगधगत होता. या हत्येचा बदला घेण्यासाठी त्यानं एक महिला आणि एका पुरूषावर धारदार शस्त्राने वार करत हल्ला केला. या हल्ल्यात त्यांचा मृत्यू झाला. या घटनेनंतर परिसरात खळबळ उडाली आहे.

सुशिला डाखोरे आणी अमोल डाखोरे अशी मृतकांची नावे आहेत. हे दोघेही मायलेक होते. मिळालेल्या माहितीनुसार, किरकोळ कारणावरून मागील वर्षी अमोल डाखोरे याने सुधाकर अवझाड यांची हत्या केली होती. अवझाड यांच्या मृत्यूनंतर त्याच्या मुलाला संताप अनावर झाला होता. त्यानं बापाच्या हत्येचा बदला घेण्याचे ठरवले.

सुधाकार अवझाड यांचा मुलगा रोहन अवझाड यानं अमोल डाखोरे आणि त्याची आई सुशीला डाखोरे यांची हत्या केली. डाखोरे कुटुंब हे आरोपीच्या शेजारीच राहत होते. आरोपीनं घरासमोरच अमोल आणि त्याच्या आईवर धारदार शस्त्राने वार केले. या हल्ल्यात अमोलचा जागीच मृत्यू झाला. तर सुशीला यांचा उपचारादरम्यान मृत्यू झाला.

आजी आणि वडिलांवर हल्ला होत असल्याचं पाहताच हिमांशु डाखोरे (वय १० वर्ष) हा मदतीसाठी धावून गेला. मात्र, मुलाच्या डाव्या हाताची दोन्ही बोटं कापली गेली. जुन्या वैमन्यासातून हा वाद झाला असल्याची माहिती आहे.

या प्रकरणाची माहिती तिवसा पोलिसांना मिळताच त्यांनी घटनास्थळी धाव घेतली. तसेच तपास करीत पोलिसांनी आरोपी रोहनला काही तासांतच अटक केली आहे. सध्या या घटनेचा अधिक तपास पोलिसांकडून सुरू असून, या घटनेनंतर परिसरात खळबळ उडाली आहे.