अमर घटारे, अमरावती

अमरावतीमध्ये भीषण अपघाताची घटना समोर आली आहे. दोन कारची समोरासमोर धडक होऊ हा अपघात झाला. या अपघातामध्ये ३ तरुणांचा जागीच मृत्यू झाला. तर ३ जण गंभीर जखमी झाले आहेत. अमरावतीच्या दर्यापूर-अकोला मार्गावर हा भीषण अपघात झाला. जखमींना उपचारासाठी रुग्णालयात दाखल करण्यात आले आहे.

मिळालेल्या माहितीनुसार, अमरावती जिल्ह्यातील दर्यापूर -अकोला मार्गावर आज दुपारच्या सुमारास दोन कारची समोरासमोर धडक होऊन भीषण अपघात झाला. गोळेगाव लातूरच्या जवळ दुपारी तीनच्या दरम्यान हा अपघात झाला. या अपघातामध्ये कारमधील तिघांचा जागीच मृत्यू झाला. तर तिघे जण गंभीर जखमी झाले आहेत. जखमींना अकोला येथील रुग्णालयात उपचारासाठी दाखल करण्यात आले आहे. घटनास्थळी येवडा पोलिसांनी धाव घेतली आहे. अपघातामध्ये मृत्यू झालेल्यांचे मृतदेह दर्यापूर उपजिल्हा रुग्णालयात आणण्यात आले आहेत. रुग्णालयाबाहेर मृतकांच्या नातेवाईकांनी मोठी गर्दी केली आहे.

या अपघातामध्ये एका कारमधील आनंद बाहकर (२६ वर्षे रा. सांग्लुडकर नगर), बंटी बिजवे (३८ वर्षे रा. गजानन मंदिर साईनगर), प्रतीक बोचे (३५ वर्षे रा. सांग्लुडकर नगर) या तिघांचा मृत्यू झाला. तर कार मधील चौथा पप्पू घाणीवाले जखमी झाला आहे. तर दुसऱ्या कारमधील आकाश अग्रवाल आणि रमेश अग्रवाल हे दोघे जण जखमी झाले आहेत. प्रतीक, आनंद, बंटी आणि पप्पू हे चौघे कारने अकोल्याला जात होते. तर विरुद्ध दिशेने आकाश आणि रमेश अकोल्यावरून दर्यापूरकडे जात होते.

अचानक कारवरील नियंत्रण सुटल्याने दोन्ही कारची समोर धडक झाली. हा अपघात एवढा भीषण होता की तिघांचा जागीच मृत्यू झाला. दोन्ही कारचा चक्काचूर झाला आहे. अपघातानंतर घटनास्थळावर वाहतूक कोंडी झाली होती. पोलिसांनी घटनास्थळी धाव घेत जखमींना तात्काळ रुग्णालयात दाखल केले. एका जखमीवर दर्यापूर उपजिल्हा रुग्णालयात उपचार सुरू आहेत. तर आकाश अग्रवाल आणि रमेश अग्रवाल या पितापुत्रांवर अकोला येथील रुग्णालयात उपचार सुरू आहेत.