अमर घटारे 
अमरावती : तळेगाव दशासर पोलिस ठाण्याच्या हद्दीतील नागापूर येथील एका पेट्रोल पंपावर रात्री दरोडा टाकण्यात आल्याची घटना घडली होती. यामुळे परिसरात खळबळ उडाली होती. दरम्यान याबाबत पोलिसात तक्रार देखील दाखल करण्यात आल्यानंतर पोलिसांनी या प्रकरणी कसून तपास करत अवघ्या तीन तासात दरोड्यातील सत्य बाहेर आणले आहे. यानंतर पोलिसांनी पाच जणांना ताब्यात घेतले आहे.  

अमरावती जिल्ह्यातील तळेगाव- दशासर पोलीस ठाण्याच्या हद्दीत पेट्रोल पंपावर दरोडा टाकण्यात आल्याची घटना घडली होती. या घटनेत दरोडेखोरांनी पेट्रोल पंपावर असलेल्या कर्मचाऱ्यांच्या डोळ्यात मिरची पुड टाकून पंपावरील कर्मचाऱ्यांकडून ३ लाख ६ हजारांची रोख लंपास केली होती. अचानक घडलेल्या या प्रकाराने खळबळ उडाली होती. या प्रकरणी पोलिसात तक्रार दाखल करण्यात आली होती. 

धक्कादायक सत्य आले समोर 

दरम्यान पोलिसांनी घटनेचा तपास सुरू केला असता यामध्ये धक्कादायक सत्य समोर आले आहे. पेट्रोल पंपच्या मॅनेजरनेच या दरोड्याचा कट रचला होता. त्यासाठीचे नियोजन करत त्याच्या चार परिचितांच्या माध्यमातून हा दरोडा घडवून आणल्याचे पोलीस तपासात समोर आले आहे. पोलिसांनी अवघ्या तीन तासांत दरोड्यातील सत्य समोर आणले आहे. 

पाच जण ताब्यात 

एका पांढऱ्या रंगाच्या इको कारमध्ये काही लुटारू आलेत, त्यांनी मिरची पुड फेकली व दरोडा टाकला होता. दरम्यान घटनेचा तपास करताना मॅनेजरवर संशय आला. यामुळे अधिक चौकशी केली असता मॅनेजरचे कबुली दिली. या प्रकरणी कर्मचारी देखील अनभिज्ञ होते. मात्र सदर प्रकरणात ग्रामीण पोलिसांनी मॅनेजरसह पाच जणांना अटक केली.