अकोला जिल्ह्यातील बोरगाव मंजू रेल्वे स्थानकाजवळ शनिवारी सकाळी घडलेल्या एका धक्कादायक घटनेने रेल्वे प्रशासन व प्रवाशांना काही काळ काळजीत टाकले. नागपूरकडून मुंबईकडे निघालेल्या मालगाडीचे कपलिंग अचानक तुटल्याने गाडीचे दोन भाग झाले. इंजिनसह काही डबे पुढे निघून गेले तर गार्ड असलेले काही डबे मागे थांबले. काही क्षणांसाठी रेल्वेमार्गावर भीतीचे सावट पसरले असले तरी प्रसंगावधान राखत रेल्वे पायलटने परिस्थिती नियंत्रणात आणली आणि मोठा अपघात टळला.

मिळालेल्या माहितीनुसार, ही घटना बोरगाव मंजू रेल्वे स्टेशनपासून काही अंतरावर पोल क्रमांक ५९९/१२ जवळ घडली. धावत्या गाडीचे कपलिंग अचानक तुटल्यामुळे गाडीचे दोन तुकडे झाले. घटनेनंतर रेल्वे कर्मचाऱ्यांनी तातडीने घटनास्थळी धाव घेतली आणि दुरुस्तीचे काम सुरू केले. या गोंधळामुळे नागपूरवरून मुंबईकडे जाणाऱ्या रेल्वे वाहतुकीवर काही काळ परिणाम झाला. मात्र, तातडीने गाड्यांचा वेग नियंत्रित करून आणि सुटलेले डबे सुरक्षित ठिकाणी स्थिर करून परिस्थिती पूर्ववत करण्याचे प्रयत्न सुरू आहेत.

सुदैवाने या घटनेत कोणतीही जीवितहानी झाली नाही. मालगाडीत मोठ्या प्रमाणावर औद्योगिक साहित्य आणि कच्चा माल भरलेला असल्याचे कळते. जर गाडी अधिक वेगाने धावत असताना ही घटना घडली असती, तर गंभीर अपघात होऊन मोठे नुकसान झाले असते. मात्र, रेल्वे पायलटच्या सतर्कतेमुळे आणि रेल्वे कर्मचाऱ्यांच्या तात्काळ प्रतिसादामुळे मोठा अनर्थ टळला.

दरम्यान, या घटनेनंतर रेल्वे प्रशासनाने कपलिंग तुटण्यामागील कारणांचा शोध घेण्यासाठी चौकशी सुरू केली आहे. मालगाड्यांच्या दुरुस्ती आणि देखभालीतील त्रुटीमुळे की तांत्रिक बिघाडामुळे हा प्रसंग घडला याचा तपास सुरु आहे. या भागातून दररोज नागपूर, भुसावळ, मुंबईकडे अनेक गाड्या धावत असतात. त्यामुळे अशा घटना टाळण्यासाठी रेल्वे सुरक्षेच्या उपाययोजनांकडे विशेष लक्ष देण्याची गरज अधोरेखित झाली आहे.

या घटनेमुळे काही काळ प्रवाशांची गैरसोय झाली असली तरी नागरिक दिलासा व्यक्त करत आहेत की वेळेवर लक्षात आल्याने मोठी दुर्घटना टळली. रेल्वे प्रशासनाने काही वेळात वाहतूक सुरळीत सुरू होईल, असा विश्वास व्यक्त केला आहे.