अक्षय गवळी 

अकोला : अकोला जिल्ह्यातील काही भागात जोरदार पाऊस झाला आहे. या पावसामुळे शेतातील नाल्याला अचानक पाण्याचा मोठा लोंढा आला. यावेळी शेतातून घरी जाण्यासाठी निघालेला शेतकरी पाण्याच्या लोंढ्यातून निघताना वाहून गेला आहे. यात शेतकऱ्याचा मृत्यू झाल्याची घटना घडली आहे. या घटनेमुळे परिवारावर दुःखाचा डोंगर कोसळला आहे. 

अकोला जिल्ह्यातील दहिगाव अवताडे शेतशिवार परिसरात ही घटना घडली आहे. यात विनायक पुंडलिकराव अवताडे (वय ५८) यांचा मृत्यू झाला आहे. तेल्हारा तालुक्यासह पहाडपट्टीत काही ठिकाणी पावसाने चांगलेच झोडपून काढले. पावसामुळे नदी- नाल्याच्या पाण्याच्या पातळीत अचानक वाढ झाली. दरम्यान, दहिगाव अवताडे शेतशिवार परिसरात असलेल्या एका नाल्याला अचानक पाण्याचा मोठा लोंढा वाहत आला. 

दरम्यान शेतकरी विनायक अवताडे यांचे दहिगाव शेतशिवार शेत असून ते शेतात कामासाठी गेले होते. याच वेळी शेत परिसरातल्या नाल्याला पाण्याचा मोठा लोंढा आला होता. साधारण काल सायंकाळी ५ वाजताच्या सुमारास नाल्यातून वाट काढत असताना अचानक आलेल्या याच्या नाल्यातील पाण्याच्या प्रवाहात अवताडे वाहून गेले होते.

रात्रभर कुटुंबियांकडून शोध
सकाळी नेहमीप्रमाणे शेतात स्वतः शेतात शेतीकामासाठी गेले होते. मात्र रात्री बराच वेळ झाला तरी विनायक अवताडे घरी आले नाही. त्यामुळे कुटुंबीयांनी रात्रभर गावात आणि शेतीच्या रस्त्यावर त्यांचा शोध घेतला. मात्र, त्यांचा काही सुगावा लागत नव्हता. दरम्यान आज सकाळी अकरा वाजताच्या सुमारास अवताडे यांचा मृतदेह नाल्याच्या परिसरात आढळून आला. दहिगाव अवताडे या गावाच्या १ किमी अंतरावर मृतदेह दिसून आला आहे. त्यानंतर नातेवाईक घटनास्थळी दाखल झाले होते.