अक्षय गवळी, अकोला

राज्यात सध्या महापालिका निवडणुकीचे वारे वाहत आहेत. कोण किती जागांवर निवडणूक लढवणार? याची वाटाघाटी एकमेकांसोबत सुरु असून, काही ठिकाणी राजकारणातील एकमेकांवरचे रुसवे फुगवे विसरून नेते मंडळींनी युती केल्याचं चित्र पाहायला मिळत आहे. मुंबई, पुण्यानंतर आता विदर्भातल्या चारही महानगरपालिकांमध्ये 'महायुती' एकत्र निवडणूक लढण्यावर शिक्कामोर्तब झाला आहे.

काल नागपुरात झालेल्या भाजप आणि शिंदे सेनेच्या बैठकीत अजित पवारांच्या राष्ट्रवादीला सोबत घेऊन निवडणूक लढवणार असल्याचं जाहीर करण्यात आलं. अकोला महापालिकेतील महायुतीतील तिन्ही पक्षांचा जागा वाटपाचा संभाव्य फॉर्म्युला 'साम'च्या हाती लागला आहे. २०१७ मध्ये जिंकलेल्या आणि सध्या तिन्ही पक्षांच्या ताब्यात असलेल्या जागा त्याचं पक्षांच्या ताब्यात राहणार आहेत.

अकोला महापालिकेत २०१७ मधील ८० पैकी ४८ जागा एकट्या भाजपकडे. तर शिवसेनेला ८ जागा मिळाल्या होत्या, तसेच राष्ट्रवादीला ५ ठिकाणी विजय मिळाला होता. त्यामूळे तिन्ही पक्षांच्या ताब्यात असलेल्या ६१ जागा सोडून उर्वरीत १९ जागांचे तिन्ही पक्षांत वाटप होणार आहे. या १८ पैकी ७ ते ८ जागा शिंदे गटाला मिळणार असून ५ ते ६ जागा राष्ट्रवादीला मिळणार आहेत. भाजप ५५, शिंदे शिवसेना १५ आणि राष्ट्रवादी १० अशी जागा वाटप होण्याची शक्यता वर्तवण्यात आली आहे. उद्यापर्यंत अकोल्यातील अंतिम जागा वाटप जाहीर होणार असल्याचे वृत्त आहे.

मात्र, भाजप आणि शिंदे गटात प्रभाग क्रमांक १७ वर तिढा कायम आहे. या प्रभागात नुकतेच ठाकरे गटातून शिंदे गटात प्रवेश केलेले शिंदेंचे महानगरप्रमुख राजेश मिश्रांच्या प्रभागात मैत्रीपूर्ण लढतीवर भाजप ठाम आहे. तर २०१७ मध्ये या प्रभागात स्वत: राजेश मिश्रा, त्यांची पत्नी आणि दोन्ही समर्थक विजयी झाले होते . या सर्वांनी नुकताच शिंदे गटात प्रवेश केला होता. मात्र २०२४ च्या विधानसभा निवडणुकीत राजेश मिश्रा यांनी अपक्ष उमेदवारी दाखल करीत २५०० मते घेतली होती . राजेश मिश्रा यांनी हिंदुत्वादी मते घेतल्याने भाजप उमेदवार विजय अग्रवाल यांचा १२८३ मतांनी पराभव झाला होता .

महायुतीतील संभाव्य जागा वाटपाचा फार्मूला :

भाजप : ५५

शिंदे सेना : १५

अजित राष्ट्रवादी : १०

अकोला महापालिकेतील पक्षीय २०१७ ची बलाबल :

एकूण जागा :८०

भाजप : ४८

काँग्रेस : १३

शिवसेना : ०८

राष्ट्रवादी : ०५

वंचित बहूजन आघाडी :०३

एमआयएम :०१

अपक्ष :०२