अक्षय गवळी, अकोला|ता. २६ जुलै २०२४

अकोल्यामधील एका भारतीय जनता पक्षाच्या कार्यकर्त्याचा अमरावतीमध्ये भीषण अपघात झाल्याची घटना समोर आली आहे. चुकीच्या दिशेने कार घेतल्याने समोरुन येणाऱ्या ट्रकने जोराची धडक दिली. यामध्ये कारमधील दोघे जागीच ठार झाले असून भाजप कार्यकर्त्यासह दोघे जखमी झालेत.

याबाबत सविस्तर माहिती अशी की, अकोल्यातील भाजप कार्यकर्त्याचा अमरावतीमध्ये भीषण अपघात झाल्याची घटना समोर आली आहे. नागपूरहून कारने अकोल्याकडे येताना ही मोठी दुर्घटना घडली. काल रात्री अकर वाजता ही घटना घडली, ज्यामध््ये दोघांचा जागीच मृत्यू झाला तर दोन जण गंभीर जखमी झाले आहेत. गंभीर जखमी झालेल्यांपैकी एकाची प्रकृती चिंताजनक असल्याचे सांगण्यात येत आहे.

भाजप आमदार रणधीर सावरकर यांचे निकटवर्तीय समजल्या जाणारे संदीप गावंडे यांच्यासह काही जण कारने नागपूरहून अकोल्याकडे येत होती. यावेळी अमरावतीजवळ त्यांनी आपली कार राँग साईडने टाकली. याच चुकीमुळे समोरुन येणाऱ्या ट्रकची आणि त्यांच्या कारची समोरा-समोर धडक झाली.

यामध्ये नकुल तडोकार आणि विजय मदनकार यांचा जागीच मृत्यू झाला. तर भाजप आमदार रणधीर सावरकर यांचे निकटवर्तीय समजले जाणारे संदीप गावंडे आणि मुकेश सरप हे जखमी झालेत. अपघातातील मृत आणि जखमी सर्व जण अकोल्यातील मोठी उमरी भागातील असल्याचे सांगण्यात येत आहे.