अजित पवारांच्या विमान अपघाताला 15 दिवस उलटून गेलेत. रोहित पवारांसह अनेक नेते व्हीएसआर कंपनीवर संशय व्यक्त करत आहेत. मात्र अजूनही व्हीएसआर कंपनीवर कारवाई करण्यात आलेली नाही. हाच धागा पकडून रोहित पवारांनी VSR कंपनीवर कारवाई का केली नाही? असा सवाल उपस्थित करत सरकारला घेरलंय.

निकृष्ट काम करणाऱ्या ठेकेदाराला ब्लॅक लिस्ट केलं जातं. चुकीचं काम करणाऱ्या अधिकाऱ्याला बडतर्फ केलं जातं, मग जीवघेणी सेवा देणाऱ्या विमान कंपनीवर कारवाई का नको? हाच न्याय VSR कंपनीलाही लावून आतापर्यंत गुन्हा दाखल करून कंपनीला टाळंही लावायला पाहिजे होतं. पण तसं होताना का दिसत नाही, हे न समजणार कोडं आहे.की कंपनीचा मालक आणि पार्टनर यांचं एवढं वजन आहे का, ज्यामुळं सरकारही त्यांच्यावर कारवाईला घाबरतं?

देशातील अनेक महत्त्वाच्या व्यक्ती, सेलिब्रिटी, सर्वपक्षीय राजकीय नेते या VSR कंपनीची सेवा घेत असतील तर त्यांचा आणि पायलटसह अन्य कर्मचाऱ्यांचाही जीव तेवढाच महत्त्वाचा नाही का? त्यामुळं माझी सरकारला विनंती आहे की, तातडीनं या कंपनीवर कारवाई करून तिच्या देशातील सेवेला बंदी घालावी.

रोहित पवारांनी विचारलेल्या प्रश्नानंतर आता संजय राऊतांनीही या प्रकरणी मोठा दावा केलाय.. VSR कंपनीत भाजप नेत्याची गुंतवणूक असल्यानेच कारवाई केली जात नसल्याचं राऊतांनी म्हटलंय. खरंतर याआधीच रोहित पवारांनी पायलटवर संशय व्यक्त केलाय.. तर पायलट अपघाताच्या आधी कुणा कुणाला भेटला, त्याचीही चौकशीची मागणी केलीय.

खरंतर राऊतांनी व्हीएसआर कंपनीत भाजप नेत्याची गुंतवणूक असल्याचा दावा केलाय.. मात्र व्हीएसआर कंपनीत गुंतवणूक असलेला भाजपचा नेता कोण? आणि त्या नेत्याच्या दबावामुळेच व्हीएसआरची चौकशी होत नाही का? हा प्रश्न मात्र अनुत्तरीत आहे.