Ajit Pawar On Election 2024: राज्यातील राजकारणाशी संबंधित एक मोठी बातमी समोर आली आहे. राष्ट्रवादी पक्षात फूट पाडून वेगळं झालेल्या अजित पवार गट आतापासूनच २०२४ च्या निवडणुकीच्या तयारीला लागला आहे. अजित पवार गटाने लोकसभा आणि विधानसभा निवडणुकीच्या तयारीला सुरुवात केली आहे.

सूत्रांनी दिलेल्या माहितीनुसार, अजित पवार गट लोकसभेला १३ ते १५ जागा लढवू शकतो. तर विधानसभेला ९० जागा लढवणार हे उपमुख्यमंत्री अजित पवार यांनी आधीच स्पष्ट केलं होतं. दोन आकडी जागा जिंकण्याची अजित पवार गटाची तयारी सुरू असल्याचं सांगण्यात येत आहे.

राष्ट्रवादीत दोन गट, अजित पवारांचा पक्षावर दावा

राष्ट्रवादीत फूट पडल्यानंतर अजित पवार यांनी थेट पक्षाच्या नावावर आणि चिन्हावर आपला दावा सांगितला आहे. अजित पवार यांनी निवडणूक आयोगात धाव आयोगात एक याचिका दाखल केली आहे. या याचिकेत राष्ट्रवादी काँग्रेस पक्ष आणि पक्षाची निशाणी घड्याळ या दोन्हींवर दावा सांगण्यात आला आहे. (Latest Marathi News)

यातच अशी माहिती समोर आली आहे की, अजित पवार यांनी दोन दिवस आधीच निवडणूक आयोगात ही याचिका दाखल केली होती. या आयाचिकेत ४० आमदारांनी सही केलेलं पात्र देखील असल्याचं समजतं आहे. यामध्ये अजित पवार यांना पक्षाच्या राष्ट्रीय अध्यक्षपदी निवड करण्यात आली असल्याचंही सांगण्यात आलं आहे.

यातच आज शरद पवार यांनी आज नवी दिल्लीत राष्ट्रवादी काँग्रेस पक्षाची राष्ट्रीय कार्यकारिणी बैठक घेतली. या बैठकीला पीसी चाको, योगानंद शास्त्री, विरेंद्र वर्मा, जितेंद्र आव्हाड, सुप्रिया सुळे, फौजिया खान, वंदना चव्हाण यांच्यासह १३ नेते उपस्थित आहेत. या बैठकीनंतर पत्रकारांशी बोलताना शरद पवार म्हणले आहेत की, मीच पक्षाचा अध्यक्ष आहे.