रुपाली बडवे

Maharashtra Politics: राज्याच्या राजकारणात मुख्यमंत्री पदावरुन सुरू असलेली रस्सीखेच थांबता थांबत नाहीये. सातत्याने विविध मंत्र्यांचे मुख्यमंत्री असा उल्लेख असलेले बॅनर पाहायला मिळतायत. अशात आता वर्षा या मुख्यमंत्र्यांच्या निवासस्थानाच्या परिसरात उपमुख्यमंत्री अजित पवारांचे बॅनर लावण्यात आलेत. (Latest Ajit Pawar News)

मिळालेल्या अधिक माहितीनुसार, मुख्यमंत्र्यांच्या शासकीय निवासस्थान वर्षा बंगला परिसरात उपमुख्यमंत्री अजित पवार यांचा मुख्यमंत्री असा उल्लेख असलेले बॅनर लावण्यात आले आहे. "जनतेच्या मनातील मुख्यमंत्री अजित पवार", असा मजकूर यावर लिहिण्यात आला आहे.

उपमुख्यमंत्री अजित पवार यांचा उद्या २२ जुलैला वाढदिवस आहे. त्यांच्या वाढदिवसानिमित्त वर्षा बंगला परिसरात हे बॅनर लावण्यात आलेत. सलीम सारंग यांनी अजित पवारांना वाढदिवसाच्या शुभेच्छा देताना हे बॅनर लावलं आहे.

या आधी एप्रिल महिन्यात देखील पुण्यामध्ये अजित पवार (Ajit Pawar) यांचा मुख्यमंत्री उल्लेख असलेले बॅनर झळकवण्यात आले होते. अजितदादा हेच जनतेच्या मनातील मुख्यमंत्री असल्याचे बॅनर्स पुण्यातील (Pune) कोथरूड परिसरात झळकले होते. आता पुन्हा एकदा असे बॅनर झळकल्याने चर्चांना उधाण आलं आहे. पुण्यातील हे बॅनर्स पाहून सर्वांच्या भुवया उंचावल्या आहेत.