राज्यातील राजकारणातील पारा चढू लागलाय. स्थानिक स्वराज्य संस्थांच्या निवडणुकीत विरोधकांचा सुपडा साफ झाला पाहिजे, असं विधान अमित शहा यांनी मुंबईत केलं. दुसऱ्या बाजुला काँग्रेसन स्वबळाचा नारा दिल्यानं राजकीय वर्तुळात खळबळ उडवून दिली आहे. भाजपबरोबरच आता काँग्रेसचे पदाधिकारी स्वबळाचा नारा देत आहेत.

अहिल्यानगरमधील काँग्रेस आमदार, पदाधिकाऱ्यांनी 'स्थानिक'साठी स्वबळाचा नारा दिलाय. काँग्रेस नेते बाळासाहेब थोरात यांनी पदाधिकाऱ्यांच्या मागणीवर काही प्रतिक्रिया दिली नाहीये.

संगमनेरच्या अमृतनगर येथे अहिल्यानगर जिल्हा काँग्रेस कमिटीची बैठक झाली. संगमनेर येथे बाळासाहेब थोरात यांच्या उपस्थितीत जिल्ह्यातील सर्व तालुकाध्यक्ष, पदाधिकारी आणि कार्यकर्त्यांची बैठक संपन्न झाली. या बैठकीत आगामी जिल्हा परिषद, पंचायत समिती आणि नगरपालिकेच्या निवडणुका काँग्रेस पक्षाने स्वबळावर लढवाव्यात अशी मागणी श्रीरामपूरचे आमदार हेमंत ओगले यांच्यासह इतर पदाधिकाऱ्यांनी केली आहे.

बाळासाहेब थोरात यांनी मात्र पदाधिकाऱ्यांच्या मागणीवर कुठलीही प्रतिक्रिया दिलेली नाही.. एकीकडे राज्यात महाराष्ट्र नवनिर्माण सेना महाविकास आघाडीत सहभागी होणार का? याकडे लक्ष लागलेले असताना दुसरीकडे अहिल्यानगर जिल्ह्यात मात्र काँग्रेस पदाधिकारी स्वबळाचा नारा देत आहेत.. त्यामुळे आगामी स्थानिक स्वराज्य संस्थांच्या निवडणुकांमध्ये आघाडीत बिघाडी होणार की एकत्रित निवडणुकांना सामोरे जाणार हे बघणं महत्त्वाचं ठरणार आहे.

अहिल्यानगर जिल्हा हा काँग्रेस विचारांचा बालेकिल्ला राहिलाय. सतत भूलथापा देऊन आणि जातीयवाद करून सत्तेवर आलेल्या महायुतीच्या पक्षांचे खरे रूप जनतेला कळालंय. यामुळे सर्वसामान्य जनता, नागरिक, युवक आणि महिला यांच्यामध्ये सत्ताधाऱ्याविरुद्ध मोठा संताप निर्माण झालाय. त्यामुळे आता काँग्रेसला अनुकूल वातावरण आहे. आगामी जिल्हा परिषद, पंचायत समिती आणि नगरपालिकेच्या निवडणुका काँग्रेस पक्षाने स्वबळावर लढवाव्यात, अशी मागणी काँग्रेस पदाधिकाऱ्यांच्या बैठकीत करण्यात आलीय.

काँग्रेस पक्षाला मोठी विचारधारा आहे. लोकनेते बाळासाहेब थोरात यांच्या नेतृत्वावर जिल्ह्यातील नागरिकांचा विश्वास आहे. आगामी जिल्हा परिषद, पंचायत समिती व नगरपरिषदेमध्ये काँग्रेसच्या कार्यकर्त्यांना मोठी संधी आहे. काँग्रेस पक्षाकडून निवडणूक लढण्यासाठी अनेक कार्यकर्ते इच्छुक आहेत. त्यामुळे सर्व निवडणुका काँग्रेस पक्षाने स्वबळावर लढवाव्यात, अशी मागणी पदाधिकारी करत असल्याचं आमदार हेमंत ओगले म्हणाले.