Ahilyanagar Branded Ice Cream Adulteration Case राज्यातील तापमानाचे प्रमाण वाढले आहे. महाराष्ट्रात एकीकडे सूर्य आग ओकत असताना दुसरीकडे थंडावा मिळावा म्हणून नागरिक थंड पेय, आईस्क्रीमचा स्वाद घेत आहेत. मात्र तुम्हाला माहित आहे का? तुम्ही खात असलेली आईस्क्रीम, कुल्फी सुरक्षित आहे का? ती कशा पासून बनवली जाते? कारण तुम्ही खात असलेली आईस्क्रीम जीवघेणी ठरू शकते. अहिल्यानगरमध्ये अन्न व औषध प्रशासनाने सोमवारी भेसळयुक्त कुल्फीविरोधात कारवाई करत तब्बल १ हजार ८५६ पॅकेट्स कुल्फी जप्त केली. विशेष म्हणजे हे पॅकेट्स नामांकित कंपनीचं आहे. या आईस्क्रीममध्ये वनस्पती तेल व फॅटचा वापर करण्यात येत असल्याचं म्हटलं जात आहे.

मिळालेल्या माहितीनुसार, अहिल्यानगर जिल्ह्यामध्ये अन्न व औषध प्रशासनाने सोमवारी भेसळयुक्त कुल्फीविरोधात कारवाई करत तब्बल १ हजार ८५६ पॅकेट्स कुल्फी जप्त केली आहे. अन्नसुरक्षा व मानदे कायद्यानुसार आईस्क्रीम आणि कुल्फी या दुग्धजन्य पदार्थांमध्ये कोणत्याही प्रकारचे वनस्पती तेल किंवा फॅट वापरण्यास सक्त मनाई आहे. कारण अतिरिक्त वनस्पती तेल वापरल्यामुळे डायबेटिस आणि हार्ट अटॅकचा धोका वाढू शकतो. मात्र तपासणी दरम्यान संबंधित कुल्फींमध्ये अशा घटकांचा वापर होत असल्याचे निदर्शनास आल्याची माहिती अन्न सुरक्षा अधिकारी राजेश बडे यांनी दिली.

दरम्यान जप्त साठ्याचे नमुने प्रयोगशाळेत तपासणीसाठी पाठविण्यात आले असून, अहवालानंतर पुढील कायदेशीर कारवाई केली जाणार असल्याचेही त्यांनी सांगितले. बडे यांनी दिलेल्या माहितीनुसार, नामंकित कंपनीच्या उत्पादित आणि पुरवठा होणार्‍या कुल्फींमध्ये भेसळ होत असल्याची माहिती प्रशासनाला मिळाली होती. त्यानुसार शहरातील वितरकांना माल पुरवठा करणार्‍या वाहनाची तपासणी करण्यात आली.

यावेळी कुल्फीचा साठा आढळून आला आणि तो तात्काळ जप्त करण्यात आला. या प्रकरणी संबंधित कंपनीला खुलासा सादर करण्याचे निर्देश देण्यात आले असून, नियमभंग सिध्द झाल्यास कठोर कारवाईचा इशारा देण्यात आला आहे. याप्रकरणी सखोल तपास करण्याचे आदेश अन्न व औषध प्रशासनाने दिली आहे.