Raigad News : मुंबई-पुणे एक्सप्रेस वेवर अपघाताची मालिका सुरूच आहे. आज सकाळी बोरघाटात तीन ट्रकची समोरसमोर धडक झाली. ही धडक इतकी भीषण होती, की यातील दोन ट्रक १०० फूट दरीत कोसळल्या. या अपघातात एकाचा मृत्यू झाला असून काहीजण जखमी झाले आहेत. अपघाताची माहिती मिळताच, पोलिसांनी घटनास्थळी धाव घेत बचावकार्य सुरू केलं आहे. (Latest Marathi News)

मिळालेल्या माहितीनुसार आज बुधवारी सकाळी सातच्या सुमारास हा अपघात झाला. मुंबई लेनवर खोपोली हद्दीत वाहनांच्या धडकेने दोन कंटेनर १०० फुट दरीत कोसळले. यात दोन्ही कंटेनरचा चक्काचूर झाला आहे. घटना घडताच स्थानिक नारिक बचाव कार्यास धावून आलेत. तसेच महामार्ग वाहतूक पोलीस (Traffic Police), खोपोली पोलीस, देवदूत यंत्रणा, अपघात ग्रस्तांच्या मदतीसाठीची टीम घटनास्थळी मदत करीत आहे.

हा अपघात इतका भीषण होता, की एक व्यक्ती जागीच ठार झाला. तसेच दरीत कोसळलेल्या कंटेनरमधील एक वाहन चालक गंभीर जखमी आहे. सध्या त्याला बाहेर काढण्याचे काम सुरू आहे. अपघात झालेल्या कंटेनरमध्ये कांदे आणि घरगुती भांड्यांची वाहतूक करणाऱ्या एका कंटेनरचाही समावेश आहे.

या अपघातामुळे बोरघाट येथे काही काळ वाहतूक कोंडी झाली. मात्र आता अपघातग्रस्त वाहने (Vehicles) रस्त्याच्या कडेला घेऊन हळूहळू वाहतूक सुरळीत होत आहे. तसेच जखमींना रुग्णालयात दाखल केले जात आहे.