तरबेज शेख

Nashik News : नाशिक त्रंबकेश्वर रस्त्यावरील हॉटेल संस्कृतीसमोर झालेल्या भीषण अपघातात दोन युवक ठार झाले. कारचा टायर फुटल्याने हा अपघात झाला आहे. टायर फुटल्यानंतर भरधाव कार विरुद्ध दिशेने येणाऱ्या दोन दुचाकींना जाऊन धडकली. यात दुचाकीवरील दोघे युवक जागीच ठार झाले आहेत.

नामदेव विठ्ठल शिद (36 वर्षे) आणि सुनील मनोहर महाले (26 वर्षे) अशी मयत तरुणांची नावे आहेत. काल म्हणजेच 19 जूनच्या रात्री हॉटेल संस्कृतीसमोर हा अपघात झाला.

मिळालेल्या माहितीनुसार, त्रंबक-नाशिक रोडवरून भरधाव वेगात एक कार येत होता. मात्र अचानक कारचा टायर फुटला. त्यामुळे भरधाव वेगात असलेली कार अनियंत्रित झाली आणि कार आपला रस्ता सोडून विरुद्ध दिशेवरुन येणाऱ्या दुचाकीला धडकली. कार वेगात असल्याने दुचाकाला दिलेल्या जोरदार धडकेत दोन्ही युवक जागीच ठार झाले. (Latest Marathi News)

अपघाताची माहिती मिळताच सातपूर पोलिसांनी घटनास्थळी धाव घेतली. दोन्ही गंभीर जखमी युवकांना उपचारासाठी जिल्हा रुग्णालयात दाखल केले असता वैद्यकीय अधिकाऱ्यांनी त्यांना तपासून मयत घोषित केले.