रायगडमध्ये भीषण अपघात झाला आहे. जिल्ह्यातील महाड भोर मार्गावरील वरंधा घाटात दुचाकीस्वाराचं गाडीवरील नियंत्रण सुटल्याने तरुण १०० फूट खाली दरीत कोसळला. या अपघातात तरुणाचा जागीच मृत्यू झाला. डोक्याला गंभीर दुखापत झाल्याने तरुणाचा अपघात झाल्याचे म्हटले जात आहे. या मृत तरुणाचे नाव शिवाजी डेरे असे होते.

मिळालेल्या माहितीनुसार, शिवाजी डेरे हा तरुण दुचाकीने मुंबईवरून त्याच्या मूळगावी शिळींब येथे जात होता. यादरम्यान रायगड आणि पुणे जिल्ह्यांना जोडणाऱ्या वरंध भोर घाटात तीव्र वळणात शिवाजी येताच त्याला साईट पट्टीचा अंदाज न आल्याने गाडी १०० फुट खोल खाली दरीत कोसळली.

या दुर्घटनेत शिवाजीला गंभीर दुखापत झाली. त्याला डोक्याला मार लागल्याने तसेच रक्तस्त्राव जास्त प्रमाणात झाल्याने शिवाजीचा जागीच मृत्यू झाला. या घटनेनंतर आजूबाजूच्या नागरिकांनी पोलिसांना पाचारण केले. पोलिसांनी तात्काळ घटनास्थळी दाखल होऊन तपासाची चक्रे वेगाने फिरवली. शिवाजीचा मृतदेह पोलिसांनी शवविच्छेदनासाठी जवळच्या रुग्णालयात दाखल करण्यात आला आहे.

पोलिसांनी दिलेल्या प्राथमिक माहितीनुसार, शिवाजीचा मृत्यू हा अपघाती आहे. १०० फूट खोल दरीत कोसळल्याने त्याच्या डोक्याला जोरात मार लागला. त्यात रक्तस्त्राव झाल्याने त्याचा मृत्यू झाला. दरम्यान तो मद्य प्राशन करून गाडी चालवत होता का याचा तपास पोलीस करत आहेत. मात्र नेमका अपघात झाला कसा? याचा पोलीस अद्यापही तपास करत आहेत. या घटनेने परिसरात भीतीचे वातावरण निर्माण झाले असून मृत तरुणाच्या कुटुंबावर दुःखाचा डोंगर कोसळला आहे.