विनोद जिरे

बीड: बीड अंबाजोगाई शहरालगत असणाऱ्या राष्ट्रीय महामार्गावर अपघाताची मालिका सुरूच असून पुन्हा एकदा अपघात झाला आहे. अंबाजोगाई - लोखंडी सावरगाव महामार्गावर ट्रॅव्हल्सने दुचाकीला धडक दिल्याने, दुचाकीस्वाराचा जागीच मृत्यू झालाय.

तुषार कोपले असं अपघातात मृत्यू झालेल्या दुचाकीस्वाराचे नाव आहे. दरम्यान, दोन दिवसांपासून अंबाजोगाईलगत जाणाऱ्या राष्ट्रीय महामार्गावर (National Highway) अपघाताच्या घटना घडत आहेत. महामार्गाचा रस्ता अरुंद आणि रस्त्याच्या मधोमध डिवायडर नसल्याने अपघात घडत आहेत. त्यामुळं रस्त्याचं रुंदीकरण करून रस्त्याच्या मधे डीव्हायडर बसवावेत, अशी मागणी नागरिकांमधून होत आहे.

दरम्यान, दोन दिवसांपूर्वीच (ता. 23) बीडमध्ये एक मोठा अपघात झाला होता. या अपघातात 7 जणांना आपला जीव गमवावा लागला होता. भरधाव वेगात असलेल्या ट्रक व क्रूझर जीपची समोरासमोर धडक होऊन झालेल्या भीषण अपघातात, 7 प्रवासी जागीच ठार झाले होते. हा अपघात बीडच्या (Beed) अंबाजोगाई (Ambajogai) तालुक्यातील अंबाजोगाई - लातूर (Latur) महामार्गावरील सायगावच्या जवळ सकाळी झाला होता.

हे देखील पाहा-

या अपघातात लातूर जिल्ह्यातील आर्वी येथून अंबाजोगाई तालुक्यातील राडी येथे एका घरगुती कार्यक्रमासाठी नातेवाईक जीपने जात होते. यावेळी सायगावजवळील खडी केंद्राजवळ समोरून भरधाव वेगात आलेल्या ट्रकने जोराची धडक दिली होती.