जरांगेंच्या आंदोलनात सहभागी न होणाऱ्या राजकीय नेत्यांचे एका सोशल मीडिया पोस्टमुळे धाबे दणाणले आहेत. मात्र या पोस्टमध्ये नेमकं काय आहे? मनोज जरांगेंनी राजकीय नेत्यांना काय इशारा दिलाय ते पाहूयात.

मनोज जरांगेंचं भगवं वादळ मुंबईच्या उंबरठ्यावर आलंय. मुंबईकडे निघालेल्या जरांगेंच्या आंदोलनाला गावागावात पाठींबा वाढत चाललाय. त्यातच आता एका सोशल मीडियावरच्या पोस्टने आंदोलनापासून अंतर राखणाऱ्या राजकीय नेत्यांचे धाबे दणाणले आहेत.

काय होती पोस्ट?

सोशल मीडियावर असलेल्या पोस्टमध्ये जरांगेंच्या आंदोलनात सहभागी न होणाऱ्या नेत्यांवर गावकीचं लक्ष असणार आहे. त्यासाठी जो नेता आंदोलनात सहभागी होणार नाही त्याची गावातील पत आणि राजकीय करियर उद्ध्वस्त करण्याचा इशाराच या पोस्टमधून देण्यात आलाय.

जो नेता समाजासाठी रस्त्यावर तोच नेता आपला, असंही या पोस्टमध्ये म्हटलंय. मात्र या पोस्टचं मूळ आहे ते मनोज जरांगेंच्या बीडच्या सभेत... जरांगेंनी बीडच्या सभेतूनच राजकीय नेत्यांवर गावकीने नजर ठेवण्याचं आवाहन केलं होतं.

लोकसभा आणि विधानसभा निवडणुकीत जरांगेंनी आरक्षणाला पाठिंबा न देणाऱ्या नेत्यांचं करियर उद्ध्वस्त करण्याचा इशारा दिला होता. त्याचा अनेक नेत्यांना मोठा फटका बसला. आता स्थानिक स्वराज्य संस्थांच्या निवडणुकीआधी जरांगेंसह मराठा आंदोलकांनी पाठिंबा न देणाऱ्या नेत्यांना इशारा दिल्याने राजकीय नेत्यांची इकडे आड तिकडे विहीर अशी स्थिती झाली आहे. त्यामुळे आता राजकीय करियरच पणाला लागणार असल्याने मतांचं गणित जुळवण्यासाठी नेत्यांना आंदोलनात सहभागी व्हावंच लागणार, हे मात्र निश्चित.