Summary -

• आठवीच्या विद्यार्थ्यावर त्याच्याच वर्गमित्रांनी चाकूने सपासप वार केले.

• घटना पाथर्डी शहरातील वीर सावरकर मैदान परिसरात भरदिवसा घडली.

• गंभीर जखमी विद्यार्थ्याला उपचारासाठी रुग्णालयात दाखल करण्यात आले.

• पोलिसांकडून आरोपींचा शोध सुरू आहे. या घटनेमुळे पालकांमध्ये भीतीचे वातावरण

सचिन बनसोडे, अहिल्यानगर

अहिल्यानगरमध्ये आठवीच्या विद्यार्थ्यावर प्राणघातक हल्ला करण्यात आला. २ वर्गमित्रांनीच भरदिवसा या विद्यार्थ्यावर चाकूने सपासप वार केले. या हल्ल्यात विद्यार्थी गंभीर जखमी झाला आहे. या घटनेमुळे अहिल्यानगरमध्ये खळबळ उडाली असून पालकांमध्ये भीतीचे वातावरण आहे. या घटनेचा तपास पोलिस करत आहेत.

मिळालेल्या माहितीनुसार, पाथर्डी शहरातील वीर सावरकर मैदान परिसरात गुरुवारी दुपारी ही घटना घडली. आठवीत शिकणाऱ्या विद्यार्थ्यावर त्याच्याच वर्गातील दोन मित्रांनी चाकू हल्ला केला. वेदांत दत्तात्रय कुलट असे गंभीर जखमी झालेल्या विद्यार्थ्याचे नाव आहे. जखमी विद्यार्थ्याच्या पाठीवर धारदार चाकूने वार करण्यात आले. हा विद्यार्थी गंभीर जखमी झाला आहे.

जखमी विद्यार्थ्यावर प्राथमिक उपचार पाथर्डी उपजिल्हा रुग्णालयात करण्यात आले. पुढील उपचारासाठी त्याला अहिल्यानगर येथील खासगी रुग्णालयात दाखल करण्यात आले आहे. वेदांत कुलट हा शहरातील एका शाळेमध्ये आठवीच्या वर्गात शिक्षण घेत आहे. गुरुवारी परीक्षा असल्याने तो दुपारी दीड वाजण्याच्या सुमारास शाळेतून घरी आला होता.

शाळेतून आल्यानंतर एका खासगी कामानिमित्त तो दुचाकीवरून शहरातील वीर सावरकर मैदान परिसरात गेला होता. याच दरम्यान त्याच्याच वर्गातील दोन मित्रांनी त्याला गाठले. किरकोळ वादातून एका मित्राने त्याच्यावर चाकूने हल्ला केला, अशी प्राथमिक माहिती पोलिसांकडून मिळाली आहे. पोलिस सध्या या घटनेचा तपास करत आहेत. सध्या हल्लेखोर फरार झाले असून पोलिस त्यांचा देखील शोध घेत आहेत. या प्रकारामुळे पालकांमध्ये चिंतेचे वातावरण निर्माण झाले आहे.