अक्षय गवळी, साम टीव्ही

Akola Crime : अकोला शहरातील जेतवन नगरात 22 वर्षीय तरुणाची हत्या झाल्याची घटना घडली आहे. तर या हल्ल्यात दोघे जण जखमी झाले आहेत. दोन आरोपींनी चाकूने भोसकून तरुणाची हत्या केली. प्रेमप्रकरणातून हत्या झाल्याची प्राथमिक माहिती समोर आली आहे.. तरुणासोबत त्याचा एक मित्रही हल्ल्यात गंभीर जखमी झाला. दोघांवर अकोला जिल्हा रूग्णालयात उपचार सुरु होते. मात्र, उपचारादरम्यान २२ वर्षीय तरुणाचा मृत्यू झाला.

करण चितळे असे हत्या झालेल्या तरुणाचे नाव आहे. ऐन संध्याकाळच्या सुमारास हत्येच्या घटनेने खदान परिसर हादरला. मारेकरी हे करण चितळे याचेच मित्र असल्याचे समजते. प्रेम प्रकरणातून करणसह त्याच्या 2 मित्रावर चाकूने वार केले होते. जवळपास या हल्ल्यात तीन जण जखमी झाले होते. मात्र, उपचारादरम्यान करण चितळे याचा मृत्यू झाला.

घटनेचा थरार सीसीटीव्ही कॅमेऱ्यात कैद झाला आहे. अकोला शहरातील जेतवन नगर भागात घटना घडली होती. खदान पोलीस अधिक तपास या प्रकरणात करत आहेत. पोलिसांनी २ संशयितांना ताब्यात घेतले आहे. या प्रकरणी पोलिसांनी पुढील तपास सुरु केला आहे.

दरम्यान, माझ्या मैत्रिणीला का बघतोय? यावरून करण चितळे याची हत्या झाल्याचे बोलल्या जात आहे. करण चितळेची हत्या झाल्यानंतर त्याच्या कुटुंबावर दु:खाचा डोंगर कोसळला आहे. करण चितळेच्या मृत्यूनंतर खदान परिसरावर शोककळा पसरली आहे.