- रणजीत माजगावकर

इचलकरंजी महानगरपालिकेत आज (शुक्रवार) दाेन अधिका-यांनी आयुक्त पदाचा पदभार घेतला. दाेन खूर्च्या टाकून दाेन आयुक्त महापालिकेचा कारभार करीत असल्याने महापालिकेत विषय चर्चेचा झाला. अखेर तासभरानंतर एका अधिका-याने कागदपत्रांच्या तपासणीनंतर आयुक्तांच्या दालनातून बाहेर पडणे पसंत केले. या नाट्यमय घडामाेडीची चर्चा आता महापालिकेच्या बाहेर देखील रंगू लागली आहे.

इचलकरंजी महानगरपालिकेचे आयुक्त ओमप्रकाश दिवटे यांची बदली झाली होती. दिवटे यांनी त्यांच्या बदलीस स्थगिती आणली. दरम्यानच्या काळात आयुक्त म्हणून कारभार पाहण्यासाठी पल्लवी पाटील यांनीही पदभार घेतल्याने गाेंधळ उडाला.

आज आयुक्तांच्या दालनात एकाच वेळीस ओमप्रकाश दिवटे आणि पल्लवी पाटील या दोघांनी एकत्रच प्रवेश केला. सूत्रांनी दिलेल्या माहितीनूसार आयुक्तांच्या दालनात ओमप्रकाश दिवटे यांनी कागदपत्रे सादर केल्यानंतर सुद्धा पल्लवी पाटील यांनी पदभार सोडला नाही. त्यामुळे दोन्ही आयुक्तांमध्ये काही काळ वादावादी झाली.

त्यातूनच दाेघांनी दोन खुर्च्या लावून कामकाज सुरु केले. तासाभरा नंतर वरिष्ठ कार्यालयात संपर्क साधून पल्लवी पाटील यांनी आयुक्तांचे दालन साेडण्याचा निर्णय घेतला. सूत्रांनी दिलेल्या माहितीनूसार त्यांनी पुन्हा कागदपत्रांची पाहणी करुन पदभार साेडला आहे.

Edited By : Siddharth Latkar