Chandrapur News: चंद्रपूरमध्ये जीप आणि ट्रकच्या भीषण अपघातामध्ये (Chandrapur Car And Truck Accident) चौघांचा दुर्दैवी मृत्यू झाल्याची घटना समोर आली आहे. चंद्रपूर शहराजवळील पडोली-घुग्घूस मार्गावर हा भीषण अपघात झाला आहे. या अपघातामध्ये जीपचा चक्काचूर झाला आहे. तर ट्रकचे देखील नुकसान झाले आहे. अपघातानंतर या मार्गावर वाहतूक कोंडी झाली होती. चंद्रपूर पोलीस (Chandrapur Police) या अपघाताचा तपास करत आहेत.

मिळालेल्या माहितीनुसार, चंद्रपूर शहरालगत पडोली-घुग्घूस मार्गावरुन प्रवास करत असताना अहमद लॉनजवळ (चिंचाळा) भरधाव जीपचा अचानक टायर फुटला. त्यामुळे चालकाचे जीपवरील नियंत्रण सुटले आणि जीपने विरुद्ध मार्गावर उभ्या असलेल्या ट्रकला जोरदार धडक दिली. या अपघातामध्ये दोन सख्खे भाऊ आणि त्यांच्या पत्नीचा जागीच मृत्यू झाला. या अपघातामध्ये जीपचा अक्षरश: चक्काचूर झाला आहे.

यवतमाळ जिल्ह्यातील मारेगावमध्ये राहणारे दोन सख्खे भाऊ आणि त्यांच्या पत्नी जीपमधून प्रवास करत होते. याचवेळी अपघातामध्ये त्यांचा दुर्दैवी मृत्यू झाला. रफिक नबी वस्ताद शेख, संजिदा रफिक शेख, युसुफ नबी वस्ताद शेख आणि मुमताज युसूफ शेख अशी अपघातामध्ये मृत्यू झालेल्यांची नावं आहेत. या अपघाताची माहिती मिळताच पडोली पोलिसांनी घटनास्थळी धाव घेत पंचनामा केला. अपघातामध्ये मृत्यू झालेल्यांचे मृतदेह शवविच्छेदनासाठी रुग्णालयात पाठवण्यात आले आहेत. पोलिसांकडून अपघाताचा तपास सुरु आहे.

दरम्यान, सोलापूरमध्ये चार वाहनांच्या विचित्र अपघातामध्ये एकाचा जागीच मृत्यू झाला आहे. तर तिघे जण जखमी झाले आहेत. सोलापूर- पुणे महामार्गावर (Solapur Pune Highway Accident News) बाळे येथे आज दुपारच्या सुमारास हा विचित्र अपघात झाला. या मार्गावर रस्त्यातच एक डंपर थांबल्यामुळे त्यापाठोपाठ येणाऱ्या चार वाहनांचा अपघात झाला. या डंपरमागील कार, दुचाकीसह चार वाहन एकमेकांना धडकली. अपघातामध्ये या वाहनांचे मोठे नुकसान झाले आहे. अपघातानंतर महामार्गावर वाहतूककोंडी झाली होती.