कर्ज फेडण्यासाठी चंद्रपूरमधील शेतकऱ्याला किडनी विकावी लागल्याच्या प्रकरणानं राज्य हादरलं होतं. मात्र या प्रकरणाची व्याप्ती मोठी आहे. अधिवेशनातही या प्रकरणाचे संतप्त पडसाद उमटले. राज्यातील 19 शेतकऱ्यांनी कर्जबाजारीपणामुळे किडनी विकली असल्याचा गंभीर आरोप विजय वडेट्टीवारांनी विधानसभेत केलाय. महाराष्ट्रात सावकारांचे राज्य असल्यासारखी परिस्थिती आहे. हे रॅकेट मोडून काढले पाहिजे, अशी मागणीही त्यांनी केली. यावर उत्तर देताना गृह राज्यमंत्री डॉ. पंकज भोयर यांनी, या प्रकरणी कारवाईसाठी एसआयटी गठित केली असल्याचे सांगितले.

सत्ताधारी आमदारांनीही या प्रकरणी सरकारला सवाल केला. हे संघटित गुन्हेगारीचे प्रकरण आहे. यातील आरोपी सुटू नयेत म्हणून त्यांना मकोका लावणार का? असा प्रश्न भाजपचे आमदार अतुल भातखळकर यांनी विधानसभेत लक्षवेधीतून केला.

चंद्रपूरमधील नागभीड येथील शेतकरी रोशन कुळे याला एक लाखासाठी ७४ लाख रुपये सावकाराला द्यावे लागले. किडनी विकून पैसे दिले. त्याशिवाय त्याची शेती गेली. ट्रॅक्टरही उचलून नेलं. या प्रकरणाच्या तपासात किडनी तस्करीचे आंतरराष्ट्रीय कनेक्शन समोर आलंय. रोशन कुळेंची कंबोडीयात किडनी काढण्यात आली होती. महाराष्ट्र सावकारी अधिनियम कायदा आहे. मात्र त्याची कडक अंमलबजावणी होत नाही. खेडोपाड्यातील सावकारीच्या कचाट्यात गरजू बळीराजा अडकतोय. त्यामुळे आता कर्जाचा डोंगर अस्मानी आणि सुल्तानी संकटानं पिचलेल्या बळीराजाच्या किडनीवर उठलाय.