माधव सावरगावे, साम टीव्ही

छत्रपती संभाजीनगर: शहरातील एका नामांकित करिअर अकॅडमीमध्ये पोलीस भरतीची तयारी करणाऱ्या अवघ्या 17 वर्षीय विद्यार्थ्याला बेल्ट आणि काठीने अमानुष मारहाण केल्याचा धक्कादायक प्रकार उघडकीस आला आहे. या रँगीगसदृश्य आणि छळाच्या प्रकरणामुळे पालकांमध्ये तीव्र संताप व्यक्त होत आहे. या प्रकरणी अकॅडमीच्या पी.टी.प्रशिक्षक आणि व्यवस्थापकाविरोधात छावणी पोलीस ठाण्यात गुन्हा दाखल करण्यात आला आहे.

बेल्ट आणि काठीने अमानुष मारहाण

मिळालेल्या माहितीनुसार, छत्रपती संभाजीनगरातील 'भारत करिअर अकॅडमी'मध्ये हा प्रकार घडला. येथे पोलीस दलात भरती होण्याचे स्वप्न घेऊन एक १७ वर्षीय अल्पवयीन विद्यार्थी पूर्वतयारी करत होता. मात्र, अकॅडमीचे पी.टी. प्रशिक्षक आणि व्यवस्थापक विवेक डाकणे याने क्षुल्लक कारणावरून या विद्यार्थ्याला बेल्ट आणि काठीने बेदम मारहाण केली. ही मारहाण इतकी अमानुष होती की, यामध्ये विद्यार्थ्याचा मोठा शारीरिक आणि मानसिक छळ झाला आहे.

या धक्कादायक मारहाणीचा संपूर्ण प्रकार अकॅडमीत लावण्यात आलेल्या सीसीटीव्ही (CCTV) कॅमेऱ्यात कैद झाला आहे. हे फुटेज आता समोर आले असून, ज्यामध्ये प्रशिक्षक विद्यार्थ्याला बेदम मारहाण करताना स्पष्टपणे दिसत आहे. या फुटेजच्या आधारे पोलिसांनी तपासाला गती दिली आहे.

मारहाणीच्या या प्रकारानंतर पीडित विद्यार्थ्याच्या नातेवाईकांनी तातडीने पोलिसांत धाव घेतली. याप्रकरणी विवेक डाकणे याच्याविरोधात छावणी पोलीस ठाण्यात गुन्हा दाखल करण्यात आला आहे. विद्यार्थ्याचा केवळ शारीरिकच नव्हे, तर रॅगिंगसदृश प्रकारातून मानसिक छळही करण्यात आल्याची नोंद फिर्यादीत करण्यात आली आहे. या प्रकरणाचे गांभीर्य ओळखून छावणी पोलिसांकडून आता या संपूर्ण घटनेची सखोल चौकशी सुरू आहे.