नागपूर : नागपूर महानगरपालिकेच्या (Nagpur Muncipal Corporation) पाणीबिलाने अनेक नागपूरकरांना शॅाक दिलाय. झोपडपट्टी भागात राहणाऱ्यांना लाखाच्या वर पाणीबिल आल्याने अनेक जण धक्क्यामध्ये आहेत. आधीच मनपाच्या नळाला पुरेसं पाणी येत नसल्याने लोक त्रस्त आहेत. त्यात आता लाखाच्या वर बिलं आल्याने लोकांना धक्का बसलाय.

हे देखील पाहा :

नितीन आवले नागपूरातील शेंडे नगर, मानवता नगर परिसरातील झोपडपट्टी भागात राहतात. महिन्याला १० हजार रुपये कमावणाऱ्या नितीन आवले यांना तब्बल १ लाख २१ हजार रुपये पाणीबिल (Water Bill) आलंय. त्यामुळे त्यांच्या संपूर्ण परिवाराला धक्का बसलाय. हातावर पोट असल्याने आम्ही लेकरांचं पोट भरायचं की लाखाच्या वर आलेलं पाणीबिल भरायचं? हा सर्वात मोठा प्रश्न आवले परिवारासमोर आ वासून उभा आहे.

फक्त आवले परिवारंच नाही तर, टेका नाका परिसरातील ५० ते ६० गरिब परिवाराला लाखाच्या वर पाणीबिल आल्याचं इथले माजी नगरसेवक सांगतात. हे बील गेल्या दहा बारा वर्षातील असल्याचं सांगितलं जातं. मात्र, या नागरिकांना नियमित बील देण्यात आलं नाही. जर नियमित बील दिलं असतं तर नागरिकांना ते भरणे शक्य झालं असतं. मात्र, तसं न करता एका दमात बिलं पाठवल्याने ते भरायचं कसं असा प्रश्न इथल्या नागरिकांना पडलाय.

Edited By : Krushnarav Sathe